Xitay hökümiti xoten wilayiti tewelikide yéngidin ikki nahiye tesis qilghan

Uyghur aptonom rayonluq xelq hökümiti yéqinda xoten teweside xé'en we xékang namliq ikki nahiye qurulghanliqini jakarlighan.

Hindistan “Wiyon” (dunya bir xewer) taratqusining 31-dékabir élan qilghan xewirige qarighanda, yuqiriqi ikki nahiye xoten wilayitining bashqurushida bolup, nahiye derijilik memuriy birlik süpitide xitay merkiziy hökümitining testiqlishigha érishken. Yulghun yéza baziri bilen shehidulla yéza baziri mezkur ikki nahiyening memuriy merkizi qilin'ghan.

Xewerde qeyt qilinishiche, atalmish xé'en nahiyesi zéminining köp qismini teshkil qilghan 38 ming kiwadrat kilométir kölemdiki zémin aqsaychin'gha tewe bolup, hindistan hökümiti bu zéminni xitay qanunsiz igiliwaldi dep eyiblep kelmekte. Buningdin 10 kün ilgiri hindistan bilen xitay wekilliri 5 yildin buyan toxtap qalghan chégra söhbitini bashlighan. Bu ikki terepning 23-qétimliq chégra söhbiti hésablinidiken. Halbuki, xitay aqsaychinni xé'en nahiyesige tewe qiliwalghandin kéyin, hindistan terep téxi buninggha inkas bildürmigen.

2020-Yil 4-ayda xitay armiyesi hindistan chégrasidin ötüp, tajawuzchiliq herikiti bashlighan bolup, sherqiy ladax rayonida hindistan armiyesi bilen tirkishish weziyiti peyda qilghanidi. Mezkur xewerde del shu sewebtin xitay bilen hindistanning chégra söhbitining 5 yil toxtap qalghanliqi tilgha élin'ghan.

Xitay xoten wilayitige qarashliq yéngidin tesis qilghan bu nahiyelerni qurushni hindistan bilen chégra söhbiti qilghandin kéyin qarar qildimu yaki hindistan qoshulmay turupla öz aldigha qarar qildimu, téxi na'éniq iken. Emma xewerde tekitlinishiche, xitayning qandaqtur xé'en nahiyesini qurup, aqsaychinning bir qismini özige tewe qiliwélishi, hindistan bilen xitay munasiwitini qayta jiddiyleshtüridiken.