Amérikadiki yehudiylar teshkilati linda sunning hökümet bayanatidin “Uyghur irqiy qirghinchiliqi” dégen sözini chiqiriwetkenlikini qattiq tenqid qilghan

Amérikadiki nopuzluq yehudiylar teshkilatliridin “Éléy wéysél fondi”, nyu-york ishtatining ishtat bashliqi ketiy xokul (Kathy Hochul) ning sabiq xitay yardemchisi linda sunning “Uyghur irqiy qirghinchiliqi” sözini ketiy xokulning bayanatidin chiqiriwétishini qattiq tenqid qilghan.

Amérikadiki “Oksiyus” torining xewer qilishiche, “Éléy wéysél fondi” linda sunning “Uyghur irqiy qirghinchiliqi” dégen sözini ketiy xokulning bayanatidin chiqiriwétish qilmishini “Qorqunchluq” dep körsetken. “Éléy wéysél fondi” amérikaliq yehudiy yazghuchisi, kishilik hoquq pa'aliyetchisi, nobél mukapati sahibi we yehudiy chong qirghinchiliqining shahiti éliy wéysél teripidin qurulghan. 1928-Yili ruminiyediki bir yehudiy a'iliside tughulup 2016-yili wapat bolghan éléy wéysél, 2-dunya urushida natsistlarning awsiwéts we boxénwald jaza lagérlirida yatqan.

“Oksiyus” torining xewiride qeyt qilinishiche, éléy wéysélning oghli, “Éléy wéysél fondi” ning mes'uli élisha wéysél, “Uyghur irqiy qirghinchiliqi” dégen sözni nyu-york ishtati bashliqining bayanatidin chiqiriwétishtek herqandaq qilmishning gheyriy insani, shundaqla tarixtiki irqiy qirghinchiliqni yoqqa chiqirish urunushlirining qayta eks étishi ikenlikini bildürgen. Bu ayning bashlirida nyu-york ishtatining bashliqi ishxanisining mu'awin mudiri, amérikaliq xitaylardin linda sun xitaygha jasusluq qilish bilen eyiblinip qolgha élin'ghan bolsimu, emma u xitay üchün jasusluq qilghanliqini ret qilghan, shundaqla bir yérim milyon dollargha képillikke qoyup bérilgen idi.

Halbuki, xewerde amérika fédératsiye teptish emeldarlirining linda sunning hökümet bayanatliridiki xitayning Uyghurlarni basturushigha da'ir sözlerni chiqiriwetkenlikini bildürgenliki qeyt qilinmaqta. “Oksiyus” ning éytishiche, élisha wéysél xitaygha baghlinishliq we hökümetning sözini shekillendürüsh hoquqi bolghan birsining ishtat bashliqi ishxanisigha soqunup kirishi kishini chöchütidighan bir weqe dégen.