"Zimistan" tori Uyghur élidiki Uyghurlarning échinishliq weziyitige a'it bir qisim tepsilatlarni ashkarilidi

Muxbirimiz irade
2019-04-02
Élxet
Pikir
Share
Print

Uyghur élidiki lagérlar we rayondiki weziyet heqqide muhim uchurlarni tarqitip kéliwatqan "Zimistan" tori 2-aprél künidiki bir xewiride Uyghur élining hazir üsti ochuq türmige oxshap qalghanliqini bildürgen.

"Zimistan" tori muxbirlirining Uyghur élidiki bir qisim xitay we Uyghur ahalilerdin igiligen ehwallirigha qarighanda, nöwette rayondiki Uyghurlar we tungganlar oxshashla islam dinigha munasiwetlik herqandaq bir nersige chétilip qélishtin qattiq éhtiyat qilidighan bolup qalghan. Melum bir xitay dukandar muxbirgha özining tunggan dostlirining "Halal" yémeklik yéyishtinmu qorqup "Hazir biz hemme nersini yeymiz. Halal yémeklik yégenlikimizni hökümet bilip qalsa öginishke élip kétidu" dégenlikini éytip bergen. U yene bir Uyghur ana we uning qizining dukandiki yopkining étigidiki neqish islamche körün'genliki üchün qorqup yopkini almighanliqini éytip bergen. 

Xewerdin qarighanda yene da'iriler hazir Uyghurlarning öylirige supa qilip, gilem sélip olturidighan aditinimu yoq qilish üchün Uyghurlarni öylirige safa élishqa mejburlimaqtiken. Bir mektep mudiri muxbirgha özining bashlamchi bolup safa almaqchi bolghanliqini, da'irilerning uning öyini tekshürüshke kélidighanliqini éytip bergen. 

"Zimistan" torining shu yerdiki xitay ahalilerdin igiligen melumatlirigha qarighanda, Uyghurlar hazir biri bilen urushup qélish, qizil chiraqtin ötüp kétishke oxshash tutami yoq sewebler bilen lagérgha élip kétilgenliktin, ular hazir birer ishni xata qilip qoyup lagérgha kirip kétishtin ensirepla yüridighan bolup qalghan. Ular hazir yolda mangsimu birer xitay bilen közi uchriship qalmasliqi üchün yerge qarap mangidighan, eger birer xitay bilen doqurushup qalsa hoduqup qattiq kechürüm sorap kétidighan bolup qalghan. Shu yerdiki lagérlardin biride xizmet qilidighan biri bolsa "Zimistan" tori muxbirigha hökümetning lagérgha qamap qoyulghan Uyghurlarni qoyuwétish niyiti yoqluqini, chünki ularning meqsitining Uyghurlarni pütünley xitaylashturush ikenlikini éytip bergen. 

Chet'ellerdiki Uyghur közetküchiler bolsa rayondiki weziyetning intayin échinishliq ikenlikini eskertip, bundaq bir jinayetke dunyaning qarap turmasliqi kéreklikini bildürüshmekte.

Toluq bet