Алматадики муһакимә йиғинида атағлиқ шаир абдумеҗит дөләтофниң иҗадийитигә алаһидә баһа берилди

Ихтиярий мухбиримиз ойған
2014.08.24
alimjan-hemrayef-rabik-ismayilof-ekhmetjan-hashirof-ve-abliz-hezim-almata-305.png Йиғинларға қатнашқучилардин солдин оңға: аблиз һезим, әхмәтҗан һашироф, рабик исмайилоф вә алимҗан һәмрайеф.
RFA/Oyghan


Йеқинда алмата шәһиридә атағлиқ шаир абдумеҗит дөләтофниң иҗадийитигә беғишланған хәлқара илмий муһакимә йиғини өтти. “тинчлиқ дуняси” тәшкилатиниң уюштуруши билән өткән мәзкур хатириләш паалийитини тәшкилат президенти, иқтисад пәнлириниң доктори, профессор абен нурманоф кириш сөз билән ачти. У мундақ паалийәтләрниң бүгүнки күндики әһмийитини атап келип, шаир иҗадийитиниң икки хәлқ оттурисидики достлуқ алақилириниң мустәһкәмлинишидики орниға мунасип баһасини бәрди.

Мурасимда филологийә пәнлириниң доктори алимҗан һәмрайефниң “а. Дөләтоф иҗадийити һәққидә һәм униң шеирийитиниң филологийә пәнигә тәсири”, филологийә пәнлириниң намзади, язғучи гүлбәһрәм хошайеваниң “акамға "хош" дәп ейталмаймән”, алмата вилайити әмгәкчиқазақ наһийисиниң челәк йезиси абдулла розибақийеф намидики оттура мәктәп муәллимлиридин гүлмира исқақованиң “а. Дөләтоф шеирлирида вәтән мавзуси”, турсунбүви өмәрованиң “а. Дөләтоф шеирлирида ана юрт мавзуси”, маливай оттура мәктипи муәллими зулфира һашированиң “а. Дөләтоф шеирлириниң тәрбийәвий әһмийити” вә башқа мавзуларда доклатлар оқулди.

Илмий йиғинда сөзгә чиққан қазақистан язғучилар иттипақи йенидики уйғур әдәбияти кеңишиниң башлиқи, язғучи әхмәтҗан һашироф, “уйғурларниң миллий бирләшмиси” президенти тамара қасимова, шаирлар әкрәм садироф, қайрат дүйсеноф, рәһиләм музәппәрова, йүсүпҗан җоллайеф вә башқилар а. Дөләтофниң көп милләтлик қазақистан әдәбияти вә уйғур әдәбиятида тутқан орнини алаһидә тәкитлиди һәм әдипкә атиған шеирлирини оқуди.

Радиомиз зияритини қобул қилған мәзкур мурасим уюштурғучилириниң бири, “тинчлиқ дуняси” тәшкилатиниң әзаси, мәрһумниң қәләмдаш қериндиши абләһәй дөләтоф мурасим һәққидә өз тәсиратини мундақ дәп баян қилди: “бу илмий муһакимә йиғиниға көплигән шаирлар, язғучилар, алимлар қатнашти. Йиғин мабәйнидә көплигән пикирләр ейтилип, уни йиғин ахирида әхмәтҗан һашироф йәкүнлиди. Өткән йиғинға, мәктәп муәллимлириниң доклатлириға интайин чоң баһа берилди, бәзилири һәтта алимларму а. Дөләтофниң ишиға мунчилик чоңқур ой салалмиған дегән пикирләрни ейтти.” йиғин пүткәндин кейин, он адәмгә а. Дөләтоф намидики медал, 57 адәмгә тәшәккүрнамә берилди. Йиғинға қирғиз радиоси, қазақ радиоси, қазақистан телевизийиси, маарип, илим - пән вә мәдәнийәт мәсилилири бойичә бирләшкән дөләтләр тәшкилатидин әл халел қарпиқоф қатнашти.

Йиғинда уйғур шаириниң, уйғур тилиниң қанчилик дәриҗидә икәнликигә қазақ достилиримиз юқири баһа бәрди. Биз һәр вақитта " икки милләт оттурисида йип өтмәйду” дәймиз. Қазақ билән уйғур достлуқиниң юқири икәнликигә мушу йиғинниң өзи бир дәлил болалиди, дәп ойлаймиз. Омумән "тинчлиқ дуняси" тәшкилатида 28 миң адәм бар. Бурунқи совет иттипақидин башқа йәнә, чәт мәмликәтләрдин чехословакийә, исраил, әрәб әмирлики бизниң тәшкилатниң һесабида. Һәр бир илмий муһакимә йиғинида, алмата шәһиридики уйғур мәктәплиридә мушаирә өткүзүп, яш талантларниң роһини көтирип, амал болса уларниң китаблирини топлашқа һәрикәт қиливатимиз. Көплигән алимлар а. Дөләтофни әсләп, әкрәм садироф охшаш шаирлар болса а. Дөләтофқа беғишланған шеирлирини оқуди. Кәлгән меһманлардин йиғин юқири дәриҗидә өтти, дегән баһа алдуқ.”

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.