Almatadiki muhakime yighinida ataghliq sha'ir abduméjit döletofning ijadiyitige alahide baha bérildi

Yéqinda almata shehiride ataghliq sha'ir abduméjit döletofning ijadiyitige béghishlan'ghan xelq'ara ilmiy muhakime yighini ötti. “Tinchliq dunyasi” teshkilatining uyushturushi bilen ötken mezkur xatirilesh pa'aliyitini teshkilat prézidénti, iqtisad penlirining doktori, proféssor abén nurmanof kirish söz bilen achti. U mundaq pa'aliyetlerning bügünki kündiki ehmiyitini atap kélip, sha'ir ijadiyitining ikki xelq otturisidiki dostluq alaqilirining mustehkemlinishidiki ornigha munasip bahasini berdi.

Murasimda filologiye penlirining doktori alimjan hemrayéfning “A. Döletof ijadiyiti heqqide hem uning shé'iriyitining filologiye penige tesiri”, filologiye penlirining namzadi, yazghuchi gülbehrem xoshayéwaning “Akamgha "xosh" dep éytalmaymen”, almata wilayiti emgekchiqazaq nahiyisining chélek yézisi abdulla rozibaqiyéf namidiki ottura mektep mu'ellimliridin gülmira isqaqowaning “A. Döletof shé'irlirida weten mawzusi”, tursunbüwi ömerowaning “A. Döletof shé'irlirida ana yurt mawzusi”, maliway ottura mektipi mu'ellimi zulfira hashirowaning “A. Döletof shé'irlirining terbiyewiy ehmiyiti” we bashqa mawzularda doklatlar oquldi.

Ilmiy yighinda sözge chiqqan qazaqistan yazghuchilar ittipaqi yénidiki Uyghur edebiyati kéngishining bashliqi, yazghuchi exmetjan hashirof, “Uyghurlarning milliy birleshmisi” prézidénti tamara qasimowa, sha'irlar ekrem sadirof, qayrat düysénof, rehilem muzepperowa, yüsüpjan jollayéf we bashqilar a. Döletofning köp milletlik qazaqistan edebiyati we Uyghur edebiyatida tutqan ornini alahide tekitlidi hem edipke atighan shé'irlirini oqudi.

Radi'omiz ziyaritini qobul qilghan mezkur murasim uyushturghuchilirining biri, “Tinchliq dunyasi” teshkilatining ezasi, merhumning qelemdash qérindishi ablehey döletof murasim heqqide öz tesiratini mundaq dep bayan qildi: “Bu ilmiy muhakime yighinigha köpligen sha'irlar, yazghuchilar, alimlar qatnashti. Yighin mabeynide köpligen pikirler éytilip, uni yighin axirida exmetjan hashirof yekünlidi. Ötken yighin'gha, mektep mu'ellimlirining doklatlirigha intayin chong baha bérildi, beziliri hetta alimlarmu a. Döletofning ishigha munchilik chongqur oy salalmighan dégen pikirlerni éytti.” yighin pütkendin kéyin, on ademge a. Döletof namidiki médal, 57 ademge teshekkürname bérildi. Yighin'gha qirghiz radi'osi, qazaq radi'osi, qazaqistan téléwiziyisi, ma'arip, ilim - pen we medeniyet mesililiri boyiche birleshken döletler teshkilatidin el xalél qarpiqof qatnashti.

Yighinda Uyghur sha'irining, Uyghur tilining qanchilik derijide ikenlikige qazaq dostilirimiz yuqiri baha berdi. Biz her waqitta " ikki millet otturisida yip ötmeydu” deymiz. Qazaq bilen Uyghur dostluqining yuqiri ikenlikige mushu yighinning özi bir delil bolalidi, dep oylaymiz. Omumen "tinchliq dunyasi" teshkilatida 28 ming adem bar. Burunqi sowét ittipaqidin bashqa yene, chet memliketlerdin chéxoslowakiye, isra'il, ereb emirliki bizning teshkilatning hésabida. Her bir ilmiy muhakime yighinida, almata shehiridiki Uyghur mektepliride musha'ire ötküzüp, yash talantlarning rohini kötirip, amal bolsa ularning kitablirini toplashqa heriket qiliwatimiz. Köpligen alimlar a. Döletofni eslep, ekrem sadirof oxshash sha'irlar bolsa a. Döletofqa béghishlan'ghan shé'irlirini oqudi. Kelgen méhmanlardin yighin yuqiri derijide ötti, dégen baha alduq.”