Русийилик тарихчи сергей кляшторний уйғурлар һәққидә тәтқиқатини йәниму давам қилмақта

Өз вақтида уйғурлар тарихи көплигән атағлиқ алимларниң диққәт мәркизидә болғанлиқи һәмдә бу һәққидә нурғунлиған әмгәкләрниң йоруқ көргәнлики мәлумдур. Инглиз, немис, франсуз, рус вә башқиму тәтқиқатчилар уйғурларниң узун тарих вә бай мәдәнийәткә игә икәнликини һазирғичә үзлүксиз тәкитләп кәлгән иди.

Бу йөнилиштә болупму русийә империйиси, шундақла сабиқ совет иттипақи алимлири җиддий ишләп, уйғурларниң пәқәт тарихила әмәс, бәлки етнографийиси, тили, әдәбияти, мәдәнийити бойичә бибаһа әмгәкләрни йезип қалдуруп кәтти. Уларниң бәзилири һазирму шу темини давам қилип, уйғурларниң техи пүтүнләй үгинилмигән яки йетәрлик дәриҗидә тәтқиқ қилинмиған саһәлирини үгинишни давам қилмақта. Әнә шуларниң бири тарихчи, шәрқшунас алим сергей кляшторнийдур.

С. Кляшторний әллик йилдин ошуқ вақит мабәйнидә түркий хәлқләрниң, җүмлидин уйғурларниң қәдимий вә оттура әсир тарихини, язма ядикарлиқлирини тәтқиқ қилип, бир қатар салмақлиқ әмгәкләрни нәшр қилған алимдур. У “қәдимий түрк руник ядикарлиқлири оттура асия тарихи бойичә мәнбә сүпитидә”, “мәркизий асия тарихи вә руник йезиқи ядикарлиқлири“, “уйғур қағанлиқиниң руник ядикарлиқлири вә явроасия далалири тарихи” қатарлиқ бир қанчилиған китабларниң апторидур. Һазир у русийә пәнләр академийиси шәрқшунаслиқ институтиниң санкт - петербургтики бөлүмидә, шундақла бир қатар алий мәктәпләрдә ишләватмақта.

Русийиниң санкт - петербург шәһиридә истиқамәт қиливатқан 85 яшлиқ сергей кляшторний радиомиз зияритини қобул қилип, русийә уйғуршунаслиқ илиминиң бүгүнки әһвали һәққидә қарашлирини оттуриға қойди.