"тарих вә бүгүн" 8-январ

Сәһипимизниң бүгүнки қисмида өткән әсирдә яшиған һәмдә 1944 - 1949 - йилидики миллий инқилабниң қәһриманлиридин бири ғәни батурниң паалийәтлири җүмлидин униң совет иттипақи рәһбәрлиридин сталин билән көрүшкәнликигә аит һәмдә викиликис ториниң қазақистан уйғурлириниң хитайниң оюп қоюп бериш тәлипини рәт қилғанлиқиға аит мәлуматлардин хәвәр таписиләр.
Мухбиримиз үмидвар
2012-01-08
Share
Gheni-batur-305 Ғени батурниң мәйдиси медалионлар билән толған сүрити.
RFA Photo

Сабиқ миллий армийә капитани, ғәни батур билән көп сөһбәтләрдә болған мәсүмҗан зулпиқарофниң ейтип беришичә, 20 - әсирдә өткән мәшһур уйғур қәһримани ғәни батур 1945 - йилидин 1970 - йилларғичә болған арилиқта бир қанчә қетим совет иттипақи алий рәһбәрлири билән көрүшкән. Буларниң ичидә совет иттипақи рәһбири йосиф сталин, қазақистан иттипақдаш җумһурийити компартийисиниң биринчи секритари дин муһәммәд қонайеф, өзбекистан иттипақдаш җумһурийити компартийисиниң биринчи секритари шәрәп рәшидоф қатарлиқ әрбаблар бар иди.

Ғәни батурниң сталин билән көрүши һәмдә совет иттипақи тәрәпниң униңға әйни вақиттики яхши кичик машина тәқдим қилғанлиқи уйғурлар арисида узундин буян давамлишиватқан мәлуматлардиндур.

Әлвәттә, ғәни батурниң сталин билән көрүшиши мәсилиси бизгә өз ағзи билән әмәс, бәлки униң сәпдашлири вә сөһбәтдашлириниң ағзи арқилиқ йетип кәлди. Ғәни батур өзи бу әһвални уларға сөзләп бәргән. Әмма, тарихий архип һөҗҗәтлири техичә уни испатлимиғанлиқи үчүн, буни һазирчә язма һөҗҗәтсиз, ағзаки тарихий материяллар қатарида муамилә қилиш мумкин.

Қазиқистан уйғурлири хитайда оюн қуюшни рәт қилди

(Камил турсун)

"Викиликс"тор бети тәрипидин ашкариланған америка ташқи ишлар министирлиқиға аит мәхпий һөҗҗәтләр ичидә, уйғурларға мунасивәтлик хәт - чәк вә доклатларму хели көп санлиқни тәшкил қилиду."5 - Июл үрүмчи вәқәси"йүз бәргәндин кейин, қазақистандики америка әлчиханиси хадимлири тәрипидин вашиңтонға йолланған "қазақистанлиқ уйғурлар хитайға уюн қоюп беришни рәт қилди"намлиқ узун доклат булардин биридур.

"Қазақистанлиқ уйғурлар хитайда уюн қоюшни рәт қилди"намлиқ бу доклатта, қазақистан уйғурлириниң нөвәттики әһвали,уларниң қазақистан даирилири билән болған мунасивити,"үрүмчи вәқәси"сәвәби билән хитайға болған наразилиқи, қазақистандики мәнпәәт гуруһлириниң қазақистан билән хитай оттурисидики мурәккәп вәзийәткә болған инкаси вә қазақистан даирилириниң хитайниң сиясий зиянкәшликигә учрап,вәтинини тәрк етишкә мәҗбур болған, уйғур панаһланғучиларға тутқан позитсийиси қатарлиқ мәсилиләр тәпсили баян қилиниду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт