“Tarix we bügün” (2013-yili 5-séntebir)

“ Tarix we bügün” sehipimizning bügünki qismida 20 - esirning 20 - 30 - yilliri arisida almuta shehiride pa'aliyet élip barghan tunji Uyghur ottura mektipi “Sopi zarwat mektipi” ning ötmüshi heqqidiki melumatlar bilen 20 - esirning 20 - yillirida Uyghur elide qurulup, sowét ittipaqi hökümitidin yardem kütken “Yash qeshqerliqler” jemiyitining pa'aliyetliri heqqide teyyarlan'ghan melumatlar diqqitinglargha sunilidu.

Deslepki Uyghur ottura mektipi - sopi zerwat mektipining ötmüshi we bügünki hayati

Oyghan teyyarlidi

Uyghurlarning öz tarixida qeyerde yashimisun milliy ma'aripi we medeniyitini rawajlundurushqa alahide köngül bölüp kelgenliki melum. 19 - Esirning axirlirida Uyghur diyarining ili wilayitidin minglighan Uyghurlarning yettisu tewesige köchüp chiqishi bilen bu yerlerde meschitler, ma'arip we sen'et ochaqliri köplep peyda bolushqa bashlidi. Bolupmu jay - jaylarda échilghan mektepler Uyghurlarning étnik süpitide saqlinip qélishida muhim rol oynidi.

Ene shundaq milliy ma'arip menbeliridin biri meshhur dölet erbabi, meripetperwer zat sopi zerwatof namidiki mekteptur. Mezkur bilim dergahi yash ewladlarni terbiyileshke, milliy kadirlarni yétishtürüshte hel qilghuchi töhpe qoshqan. Epsuski, waqitning ötüshi bilen mektep memlikettiki ijtima'iy - siyasiy özgürüshler tüpeyli öz namini yoqatti. Hazir u almuta wilayiti panfilof nahiyisining merkizi yarkent shehiridiki oqush orunlirining biri süpitide pa'aliyet élip barmaqta.

Almuta shehiride tesis qilin'ghan sopi zarwat namidiki Uyghur ottura mektipi 20 - esirning 20 - 30 - yillirida köpligen dangliq Uyghur ziyaliyliri, edibliri we siyasiy erbablirini terbiyiligen idi.

Radi'omiz ziyaritini qobul qilghan péshqedem zhurnalist abdukérim tudiyarof zerwat mektibining ötmüsh tarixigha toxtaldi.