“Türk dunyasi tarix zhurnili”ning 7 - ayliq sani Uyghur mesilisige béghishlandi

Merkizi türkiyening istanbul shehride turushluq sherqiy türkistan tetqiqat wexpi teripidin neshir qiliniwatqan “Türk dunyasi tarix zhurnili”ning 7 - ayliq sanida Uyghur mesilisige alahide orun bérildi. Ayda bir san neshir qiliniwatqan zhurnalning 2015 - yili 7 - ayliq sani mexsus Uyghur mesilisige ayrilghan bolup, mezkur sanda zhurnalning bash tehriri közxan yazghan ependi yazghan “Türklerning qanighan yarisi - sherqiy türkistan” mawzuluq bash maqalisigha, dr. Qilich bughra qanat yazghan “Sherqiy türkistan tragédiyisi - Uyghurlar duchar boliwatqan zulum” mawzuluq maqalisigha we sherqiy türkistan weqpining sabiq bash katipi hamut göktürk bilen élip bérilghan “Sherqiy türkistandiki weqeler toghrisida söhbet” mawzuluq uzun sohbet xatirisige orun bérilgen.

Türk dunyasi tetqiqatliri weqpining bashliqi, zhurnalning bash tehriri közxan yazghan ependi, zhurnalgha yazghan bash maqalisida sherqiy türkistan'gha béghishlap mexsus san chiqirishtiki meqsiti toghrisida toxtilip mundaq dep yazghan:

Bügünki künde sherqiy türkistan nopusining köpini xitaylar igilep boldi. Xitay sherqiy türkistanni bésiwalghandin kéyin Uyghur qérindashlirimiz qiyin weziyette yashashqa mejbur bolmaqta. Xitayning bu bésimigha naraziliq bildürgen Uyghurlar wehshilik bilen basturulmaqta. Jama'et erbapliri, ziyaliylar xalighanche tutqun qilinmaqta, ten jazasigha uchrimaqta we ölüm jazasi bérilmaqta.

Öz wetinide azsanliq millet haligha chüshüp qalghan Uyghurlar, ishsiz qalmaqta, yoqsullashturulmaqta we Uyghurlar xitaylashturiliwatqan bügünki künde dunya döletliri buninggha qarap turmaqta. Bundaq bir peyitte Uyghur tragédiyesini türk jama'etchilikige anglitish üchün sherqiy türkistan üchün mexsus san chiqarduq.

Biz zhurnalning bu sanida sohbet xatirisi élan qilin'ghan Uyghur xewer tetqiqat merkizi mes'ulliridin hamut göktürk we teklimakan Uyghur neshiriyati bashliqi abdujélil turan ependi bilen sohbet élip barduq.

Ular “Türk dunyasi tarix zhurnili”ning 28 yildin béri izchil halda neshir qiliniwatqan türkiy milletlerning tarixi, medeniyiti we arxé'ologiyesi toghrisidiki maqalilargha orun bérilgen zhurnal ikenlikini, pütün türkiy jumhuriyetler we türkiy milletler rayonlirigha tarqitiliwatqanliqini, bu zhurnalning sherqiy türkistan toghrisida mexsus san chiqirishining zor ehmiyetke ige ikenlikini bayan qildi.