Türkiyediki ikki chong partiye birleshme hökümet qurushqa muweppeq bolalmidi

Muxbirimiz erkin tarim
2015-08-17
Share
turkiye-adalet-jumhuriyet-partiye.jpg Türkiyediki ikki chong partiye wekilliri
RFA/Erkin Tarim


Türkiyening eng chong partiyeliridin adalet we tereqqiyat partiyesi bilen jumhuriyet xelq partiyesi birleshme hökümet qurushqa muweppeq bolalmidi.

6 - Ayning 7 - küni türkiyede ötküzülge omumiy saylamda héchqandaq bir partiyedin 275 parlamént ezasi parlamént ezaliqigha saylinalmighanliqi üchün hökümet qurush hoquqigha érishelmigen idi. Bundaq bir weziyette türkiyening asasiy qanunigha asasen jumhur re'isi rejep tayyip erdoghan birleshme hökümet qurush hoquqini a q p re'isi exmet dawutoghlugha bergen idi. Qanun'gha asasen 45 kün ichide hökümet qurulalmisa qayta saylam élip bérilidiken. Ikki partiyening rehberliri köp qétim uchriship birleshme hökümet qurushning shertliri toghrisida muzakire élip barghan bolsimu uchrishishlardin netije chiqmidi. 8 - Ayning 13 - küni adalet we tereqqiyat partiyesi re'isi exmet dawutoghlu muxbirlargha bayanat bérip, jumhuriyet xelq partiyesi bilen ötküzülüwatqan birleshme hökümet qurush muzakirisining netijisiz axirlashqanliqini éytti. U, ikki partiye otturisida ortaqliq quridighan ortaq pikirning yoqliqini, yeni asasi mesililerde kéleshelmigenlikini bayan qildi. U, tashqi siyaset bilen ma'arip siyasitide jumhuriyet xelq partiyesi bilen tüptin oxshimaydighan köz qarashqa ige ikenlikini, shunga kélishelmigenlikini, qaytidin saylam élip bérishning zörür ikenlikini bayan qildi. Adalet we tereqqiyat partiyesi bilen adalet we tereqqiyat partiyesining tashqi we ma'arip siyasitidiki oxshimasliqliri néme idi? qayta saylam bolsa kim utup chiqar? jumhuriyet xelq partiyesi bilen birleshme hökümet qurghan bolsa bu hökümetning Uyghur siyasiti qandaq bolar idi? dégen'ge oxshash su'allargha jawab tépish üchün türkiye istratégiyilik chüshenche instituti mutexessisi doktor erkin ekrem bilen söhbet élip barduq.

U, adalet we tereqqiyat partiyesi bilen jumhuriyet xelq partiyesining birleshme hökümet qurushta muweppeq bolalmasliqidiki sewebliri we birleshme hökümet qurulghan teqdirde sherqiy türkistan mesilisige qandaq tesir körsitidighanliqi toghrisida toxtaldi. U, jumhuriyet xelq partiyesining xitay bilen bolghan munasiwitining yaxshi ikenlikini, gerche partiye ichide Uyghur mesilisige köngül bölidighan kishiler bolsimu partiyening tashqi siyasitide sherqiy türkistan mesilisining mewjut emeslikini bayan qildi. Milletchi heriket partiyesi bilen adalet we tereqqiyat partiyesi birleshme hökümet qurghan teqdirde Uyghur mesilisige ijabiy tesir körsitidighanliqini bayan qildi. U, qayta saylam bolghan teqdirde yene bir partiyening öz aldigha hökümet quralighidek ray alalmasliqining mumkin ikenlikini bayan qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet