Proféssor nezer: Uyghurlarning öz tarixigha ige chiqalmasliqi Uyghur tibabitining dunyagha yüzlinelmeslikidiki asasiy seweblerning biri

Ixtiyariy muxbirimiz ekrem
2013-04-28
Share
muhemmed-omer-nezer-305.jpg Pro. Dr. Muhemmed ömer nezer ependi
RFA/Ekrem

27 - April küni d u q we yawrupa sherqiy türkistan birliki teshkilatining uyushturushi bilen, türkiyidin kelgen pro. Dr. Muhemmed ömer nezer ependi gérmaniyining myunxén shehiridiki dunya Uyghur qurultiyining pa'aliyet zalida Uyghurlargha tibbiy ilimlerdin sawat berdi.

Bu pa'aliyet shenbe küni kech sa'et 6:00 - 9:30 ghiche qeder dawamlashti. Tibbiy ilimlerdin sawat bérish ikki xil tür boyiche élip bérildi. Biri, bügünki méditsina ilmining tereqqiyati we köp körülidighan késelliklerni dawalash. Ikkinchisi, Uyghur milliy tibabitining roli we dawalash ünümi.

Bu qétimqi pa'aliyetke ishtirak qilghan Uyghur jama'iti pro.Dr. Muhammed ömer nezer ependidin özliri giriptar bolghan türlük késellikler toghruluq so'allar soridi. Nezer ependi zamaniwi tibbiy ilim we Uyghur milliy tibabiti nuqtisidin bu késelliklerni dawalashning usulliri toghrisida chüshenchiler berdi.

Kishilerni hemmidinmu bekrek qiziqturghini, bügünki tibbiy ilim dunyasida yéngidin barliqqa kéliwatqan dora we dawalash rétsiplirining Uyghur milliy tibabiti tarixida qanche ming yillar ilgirila qollinilip kélin'genlikige a'it uchurlar boldi. Ejdatlirimiz tarixta yekünlep chiqqan dawalash usuli we rétsiplirining hazirqi zamandimu rolidin qalmighanliqi kishilerni heyran qaldurdi.

Myunxén shehride yashawatqan diniy zatlardin abdujélil ependi bu xususta tesiratini bildürüp, öz ejdatlirining eqil - parasitige bolghan qayilliqini izhar eylidi. Merkizi myunxén shehiridiki yawrupa sherqiy türkistan birliki teshkilatining mu'awin re'isi rahile xanim bolsa, bu qétimqi léksiyidin köp nersilerni biliwalghanliqini tilgha aldi. U sözide yene, Uyghur millitining milliy sapasini yuqiri kötürüshte anilarni süpetlik terbiyileshke ehmiyet bérishning tolimu zörürlikini tekitlidi.

Türkiye'ide tibabet ilmi bilen shughulliniwatqan pro. Dr. Muhemmed ömer nezer ependi pa'aliyet xatimisidde ziyaritimizni qobul qilip, Uyghur milliy tibati ilmi toghrisidiki so'allirimizgha jawab berdi. U sözide, Uyghur milliy tibabitini dunyagha yüzlendürüsh üchün, uni sistémiliq tetqiq qilish we tonutush lazimliqini tilgha aldi. U yene, yingne bilen dawalash qatarliq eslidinla Uyghurlar keship qilghan dawalash usulliri heqqide toxtaldi.

Bu qétimqi pa'aliyetke qatnashqan Uyghur jama'iti axirida, bu qétimqi léksiyidin köp memnun bolushqanliqlirini izhar qilishti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet