Kuchada saqchixana bashliqi hémit qarining lagérda ölgenlerge héssidashliq qilghanliqi üchün tutqun qilin'ghanliqi ashkarilandi

Muxbirimiz shöhret hoshur
2019-10-17
Élxet
Pikir
Share
Print
Uyghur rayonidiki xitayning 13-déwiziyesi "Terbiyelesh lagéri" ning aldi derwazisi. 2017-Yili aldinqi yérim yili, qumul.
Uyghur rayonidiki xitayning 13-déwiziyesi "Terbiyelesh lagéri" ning aldi derwazisi. 2017-Yili aldinqi yérim yili, qumul.
BITTER WINTER

Yéqinda kuchaliq muhajirlardin biri radiyomizgha uchur yollap, yurtidiki alaqe torliridin anglighanlirigha asasen kucha nahiye ucha bazarliq saqchixanisining bashliqi hémit qarining bir sorunda öz tewelikidin lagérda ölgenlerning köp ikenlikini échinish teleppuzida tilgha alghanliqi üchün "Dölet mexpiyetlikini ashkarilash" we "Jinayetchilerge héssidashliq qilish" bilen eyiblinip, tutqun qilin'ghanliqini melum qilghan idi. Muxbirimizning kuchagha qarita élip barghan téléfon ziyaretliri dawamida sabiq saqchixana bashliqi hémit qarining tutqunda ikenliki delillendi we uning yéqinda kuchada tarqitilghan bir "Saqchi ibret filimi" de körsitilgenliki ashkarilandi.

Hörmetlik radiyo anglighuchilar, kuchaliq muhajirning radiyomizgha bildürishiche, kucha nahiye ocha bazarliq saqchixanining bashliqi hémit qari bu yilning béshida dostliri bilen olturghan bir sorunda lagér qurulghandin buyan öz tewelikidin köp sanda kishini axiretke uzitip qoyghanliqini échinish teleppuzida tilgha alghan. Bu gepni éghizdin chiqirip bir heptidin kéyin kucha nahiyelik j. X. Idarisining intizam tekshürüsh bölümi teripidin chaqirtilghan. Shu chaqirtilishtin bir hepte kéyin u wezipisidin toxtitilghan we tutup turup tekshürülüsh üchün qamaqxanigha ekitilgen. Inkastin hémit qarining mezkur sözlirini qaysi sahediki dostliri bilen olturghanda qilghanliqi melum emes, emma inkasta hémit qarining "Dölet mexpiyetlikini ashkarilash" we "Jinayetchilerge héssidashliq qilish" gumani bilen tutulghanliqi eskertilgen.


Téléfonimizni qobul qilghan alaqagha yéziliq saqchixana xadimi ocha saqchixana bashliqi hémit qarini tonumaydighanliqini bayan qildi. Ocha bazarliq saqchixanining nöwetchi xadimi sabiq saqchixana bashliqi hémit qarini tonuydighanliqini inkar qilmidi, emma uning nöwette qeyerde ikenliki, tutqunda yaki emesliki heqqidiki so'alimizgha jawap bermidi. 

Radiyomizgha kelgen inkasta hémit qarining bu yil 45 yashlar chamisida ikenliki, uning 2017 ‏-yildin ilgiriki xitayning qattiq zerbe dolqunlirida aktip rol alghanliqi, emma 2017 ‏-yildin kéyinki lagérlargha adem toplashta ilgirikidek derijide aktip bolup ketmigenliki eskertilgen. Téléfonimizni qobul qilghan kuchadiki yene saqchi xadimi hémit qarining ehwalidin xewiri barliqini bayan qildi, emma uning öz tewelikidin lagérda ölgenlerning sanini ashkarilap qoyghanliqi üchün tutulghanliqi uchurining toghra-xataliqi heqqidiki so'alimizgha jawaben bu heqtiki uchurlarni bashqilar bilen xalighanche ortaqla'ishalmaydighanliqini éytti. Xadimlar yene saqchi bashliqi hémit qarining éghizidin chiqqan ocha baziridin lagérda ölgenler sanining éniq halda qanche ikenliki heqqidiki so'alimizghimu yuqirining testiqisiz jawap bérelmeydighanliqini bayan qildi. 

Radiyomizgha kelgen inkasta bu yilning otturiliri kuchada qanun sahesidikilerge ichki yighin échip, hémit qarining xatalashqanliqi we tutqun qilin'ghanliqi heqqide omumi uqturush chiqirilghanliqi tilgha élin'ghan. 

Axirida téléfonimizni qobul qilghan kucha nahiyelik j x idarisining bir xadimi özlirining nöwette "Saqchi ibret filmliri" ni körüwatqanliqi we uningdin xatire qalduriwatqanliqini bayan qilish jeryanida "Ibret filimi" de atalmish jinayiti yaki xataliqi tonushturulghan kishiler arisida ocha bazarliq saqchixanining bashliqi hémit qariningmu barliqini delillidi. Bu xadim hémit qarining öz tewelikidin lagérda ölgenlerning köplikige échin'ghanliqi üchün tutulghanliqi heqqidiki so'alimizgha neq jawap bermigen bolsimu, emma uning atalmish jinayetchilerge héssidashliq qilish bilen eyiblen'genlikini ashkarilidi.

Toluq bet