Qazaqistanliq abduwahap hakim: "Tagham abduxélil hashim künes türmiside jan üzgen, uruq-tughqanlar xewer yetküzüshkimu charisiz"

Muxbirimiz shöhret hoshur
2021-05-07
Share
Qazaqistanliq abduwahap hakim: Künestiki yéngi türmide jan üzgen, ghulja shehiridiki tömür sodigiri abduxélil hashim a'ilisi bilen. (Waqti we orni éniq emes)
Oqurmen teminligen

Qazaqistanda yashawatqan Uyghurlardin tijaretchi abduwahap hakimning radiyomizgha inkas qilishiche, uning ghulja shehiridiki taghisi - tömür sodigiri abduxélil hashim 2‏-may küni künestiki yéngi türmide jan üzgen. Abduwahapning diyishiche, u bu uchurni özining Uyghur rayonidiki munasiwetlik uchur qanalliri arqiliq igiligen. Emma uning ghuljadiki uruq-tughqanliri abduxélilning ölümi heqqide héchqandaq uchur bérelmigen. Muxbirimizning téléfo'inini qobul qilghan künes we ghulja shehiridiki alaqidar xadimlar abduxélil hashimning ehwali heqqide melumat bermidi, emma uning ölüm xewirinimu inkar qilmidi.

Qazaqistan wetedishi abduwahap hakim Uyghur rayonidiki alaqidar uchur qanalliri arqiliq künestiki bir türmide jaza mudditini ötewatqan taghisi abduxélil hashimning2-may küni türmide jan üzgenliki heqqide uchur alghan. Melum bolushiche, bu yil 59 yashqa kirgen abduxélil hashim ghulja sheher töpichi mehellidin bolup, u 2017‏-yili lagérgha ekitilgen we 2019-yilning axiri 19 yilliq késiwétilgen iken. Melum bolushiche, abduwahap bu uchurni alghandin kéyin, aldi bilen ghulja shehiridiki uruq-tughqanlirigha téléfon qilip we ündidarda söz qaldurup, taghisining ehwali heqqide melumat sorighan. Emma uning aldida bezide künde, bezide heptide bir sözliship turuwatqan uruq-tughqanliri bu qétim téléfonni héchqaysisi almighan we ündidardiki so'aligha jawap qayturmighan.

Biz bu uchurning toghriliqini aydinglashturush üchün, ili oblastliq türme bashqurush idarisigha téléfon qilduq. Téléfonimizni qobul qilghan xadim abduxélil hashimning ehwali heqqide melumati yoqluqini éytti. Biz uningdin yéqinqi künlerde ghulja sheher töpichi mehellisidiki ahalilerdin türmide jaza mudditini ötewatqan a'ile ezasining ölüm sewebi yaki jesitini sorap téléfon qilghan yakiqilmighanliqini soriduq. U özining bundaq bir iltimasni qobul qilmighanliqini éytti. Biz uninggha abduxélil hashimning 2-may küni jan üzgenlikini bildürginimizdin kéyinla, u bu ishlarning dölet mexpiyetlikige yatidighanliqi, bu xil so'allargha jawap bérelmeydighanliqini eskertti.

Abduwahap hakimning ashkarilishiche, u bu uchurni aydinglashturush üchün ghulja shehiridki qaradöng saqchixanisi we qazaqistandiki xitay elchixanisigha téléfon qilip baqqan bolsimu, téléfoni qobul qilinmighan. U da'irilerdin we ghulja shehiridiki uruq-tughqanliridin bu heqte jawap alalmighandin kéyin yene bashqa qanalliri ariliq künesning özidin ehwal sürüshte qilghuzghan. Bu qétimmu yenila abduxélil hashimning türmide ölgenliki heqqide uchur alghan we hetta abduxélilning ghulja shehiridiki öyige anchemunche-petichilerningm'u kirip-chiqiwatqanliqi heqqide uchur alghan. Ghulja sheherlik saqchi idarisining xadimimu bu heqtiki so'alimizgha jawap bérelmidi.

Abduwahapning déyishiche, abduéxélil hashimning ölüm uchuri kocha xewerliri arqiliq uning qazaqistandiki uruq-tughqan we tonush-bilishliriningmu quliqigha yetken. U tönügündin bashlap öyide petchilerni kütiwélishqa bashlighan.

Küneste türmide wezipe ötewatqan bir xadim'abduxélil hashimning ölümi heqqidiki so'allirimizgha buninggha peqet türme siyasiy bölüminingla jawap béreleydighaliqini bildürdi we abduxélilning ölüm xewirini inkar qilimidi.

Biz abduxélil hashimning tutqunda ikenliki heqqide aldinqi yili bir xewer bergen iduq. Shu xewirimizde qeyt qilinishiche, 3 balining atisi bolghan abduxélil hashim shangxeyde 20 yilche tijaret qilghan, kéyinki mezgillerde qazaqistandiki uruq-tughqanliri bilen hemkarliship xelq'ara tömür sodisi bilenmu shughullan'ghan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet