Qeshqer wilayetlik qatnash idarisning bashliqi abliz toxtajining 7 yilliq késilgenliki delillendi

Muxbirimiz shöhret hoshur
2021-02-03
Share
Qeshqer wilayetlik qatnash idarisning bashliqi abliz toxtajining 7 yilliq késilgenliki delillendi Qeshqer wilayetlik qatnash idarisining sabiq bashliqi, mehbus abliz toxtaji. (Waqti we orni éniq emes)
Oqurmen teminligen

Yéqinda qeshqer weziyitidin xewerdar kishilerdin biri radiyomizgha uchur yollap, qeshqer shehiride ilgiri bille meshrep oynighan 16 kishidin 14nepirining tutqun qilin'ghanliqi we köpinchisining késiwétilgenlikini melum qildi. Inkasta déyilishiche, qeshqer wilayetlik qatnash bashqurush idarisining bashliqi abliz toxtajinimu öz ichige alghan bu meshrep ehli, 2014 ‏-yili we uningdin ilgiriki yillarda oynighan meshrepshliri seweplik "Qanunsiz toplinish we teshkillinish" bilen eyiblinip, 2017 ‏-yilning otturiliri tutqun qilin'ghan. Muxbirimizning bu heqtiki éniqlashliri dawamida, mezkur meshrep ezaliridin abliz toxtajining tutqunda ikenliki delillendi.

Hörmetlik radiyo anglighuchilar, qeshqer weziyitidin xewerdar kishilerdin birining inkas qilishiche, qeshqerde iqtisadiy, memuriy we sen'et saheside belgilik orun'gha ige bolghan kishilerdin wilayetlik qatnash idarisining bashliqi abliz toxtaji, jonggu télégiraf shirkiti qeshqer shöbisining inzhéniri obulqasim abduréhim qatarliq 16 kishi bala waqitliridin bashlap tonushidighan qedinas dostlardin bolup, ular ishliri rawaj tapqan kéyinki yillardimu öz'ara tashlashmay dostluqini dawamlashturghan we 2014‏-we uning aldidiki yillarda meshrep oynap, meshrepte yighilghan pullirini öz etrapliridiki muhtaj kishilerge yardem qilghan. Bularning tutulushidin 3 yil burunqi bu ish-izliri gerche qeshqer xelqighe tonulghudek derijide keng we tesirlik bolmighan bolsimu, lagér tutquni bashlan'ghanda ularning isimliri qara tizimlikning deslepki betliridin orun alghan.

Biz bu uchurning toghra-xataliqini aydinglashturush üchün qeshqerdiki alaqidar idare organlargha téléfon qilduq. Nöwettiki siyasiy weziyetning sezgürliki, bolupmu, hökümetning chet eldin kelgen téléfonlarni qobul qilmasliq heqqidiki jiddiy agahlandurushliri sewbidin, mezkur meshrep heqqidiki so'alimiz asasen dégüdek jawapsiz qaldi.

Inkasta bayan qilinishiche, abliz toxtaji we dostliri adette jem'iyettiki jiddiy mesile we hadisilerdin özlirini uzaq tutup kelgen, a'ile we xizmet ishidin bashqigha bek köngül bölmigen, bosh waqitlirini saz-muzikawe külke-chaxchaq bilen ötküzüshke adetlen'gen kishiler bolup, ular peqet mehellidiki bir qisim yurt chongi we diniy zatlarning tewsiyesi bilen meshrepte toplan'ghan pullirini, shu zatlarning qolliri arqiliq muhtajlargha yetküzgen iken. 2014-‏Yili5 ‏-ayda Uyghur rayonida atalmish "Diniy esebiylikke qarshi herket" qozghalghanda, ular munasewet qilghan diniy zat tutqun qilin'ghan. Shu chaghda ular bu diniy zatlargha chétilip birqanche qétim soraq qilin'ghandin kéyin qoyuwétilgen. Ular shuningdin kéyin meshrep oynashni toxtatqan bolsimu, emma bu meshrepning derdini tartishtin qutulalmighan.

Ötken ayda téléfonimizni qobul qilghan qeshqer wilayetlik qatnash idarisining xadimi deslepte bu idaride abliz toxtaji isimlik bir kishining bolmighanliqini éytti. Aridin birqanche hepte ötkendin kéyin téléfonimizni qobul qilghan yene bir xadim, bu idaride abliz toxtaji isimlik bir kishi bolghanliqini inkar qilmidi.

Inkasta bayan qilinishiche, 2017 ‏-yili 5‏-ayda meshreptiki 16 kishining hemmisi tengla tutqun qilin'ghan. Ular bir yildin artuq "Telim-terbiye" din kéyin, peqet ikkisila qoyup bérilgen. Qalghan 14nepiri oxshimighan muddette késiwétilgen.

Qeshqer wilayetlik partkomning bir xadimi qatnash idarisining bashliqi abliz toxtajining tutup kétilgenlikini we bu heqte wilayetlik partikomda uqturush tarqitilghanliqini ashkarilidi. Abliz toxtaji olturushluq ahaliler kométiti tewe saqchixana xadimining ashkarilishiche, "Abliz toxtaji soraq dawamida pozitsiyesi yaxshi bolghanliqi üchün, bashqilargha nisbeten az, yeni 7 yilliq késilgen." emma bu xadimning bayanliridin uninggha konkirét qandaq jinayet artilghanliqi we qalghan dostlirining qanche yilliqtin kéilgenliki hazirche melum emes. U nöwette yerkendiki peylu türmiside jaza mudditini ötimektiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet