Б д т органлири сүрүштә қиливатқан тутқун әзимәт әнвәрниң 15 йиллиқ кесиветилгәнлики оттуриға чиқти

Мухбиримиз шөһрәт һошур
2020-06-12
Елхәт
Пикир
Share
Принт
Тутқун қилинған таксим сода сарийиниң директори әнвәр турсунғоҗа (солда) вә униң оғли әзимәт әнвәр (оңда).
Тутқун қилинған таксим сода сарийиниң директори әнвәр турсунғоҗа (солда) вә униң оғли әзимәт әнвәр (оңда).
Photo: RFA

Ғулҗа шәһиридики дада-бала тутқунлардин әнвәр турсунғоҗа билән әзимәт әнвәрниң йолсиз тутқун қилиниш мәсилиси, хәлқара адвокатларниң қол тиқиши билән б д т ниң алақидар органлириға йетип барған вә бу органлар, хитай һөкүмитигә материял йоллап бу дада-балиниң әһвалини сүрүштә қиливатқан мәзгилидә, оғул әзимәт әнвәрниң 15 йиллиқ кесилгәнлик учури оттуриға чиқти. Мәсул адвокат майкил полак уйғур районидики вәзийәтниң инсанийәткә қарши җинайәт икәнликини тәкитләш билән бирликтә, бу дада-бала мәһкумларниң һәқ-һоқуқи үчүн башлиған һәрикитини тохтатмайдиғанлиқини билдүрди.

Ғулҗа шәһиридики таксим сода сарийиниң саһиби әнвәр турсунғоҗа түркийә билән тиҗарәт қилғанлиқи вә униң оғли әзимәт әнвәр түркийәдә оқуп кәлгәнлики үчүн 2018 ‏-йили 1 ‏-вә 4 ‏-айларда тутқун қилинғаниди. Бу дада-бала тутқунларниң канада, норвегийә, германийә вә шиветсийәдә яшаватқан уруқ-туғқанлири өткән йилниң ахиридин башлап гуваһлиқ баянатлирини елан қилғандин кейин, «чәтәлдики адаләт» намлиқ адвокатлар ширкити бу һәқтә дело турғузуп, әһвални бу йил 3 ‏-айда б д т ниң алақидар органлириға йоллиғаниди. Мәзкур ширкәтниң тор бетидики бир хәвәрдин мәлум болушичә, мәсул адвокат майкил полак өткән айниң 14 ‏-күни, б д т ниң мәҗбурий ғайиб қиливетилгәнләр хизмәт гурупписи вә халиғанчә тутқун қилинғанлар ишханисиниң мәсуллири билән видийолуқ көрүшкән вә бу көрүшүштә униңға, мәзкур дада-балиниң немә үчүн тутулғанлиқи һәм нәдә икәнлики һәққидә мәлумат тәләп қилип хитай тәрәпкә материял йолланғанлиқи уқтурулған. Мәлум болушичә, б д т органлири вә дада-бала тутқунниң чәтәлдики уруқ-туғқанлири хитай тәрәптин бир җаваб күтүп турған бу мәзгилдә тутқун әзимәт әнвәрниң қорғас наһийәсидә ечилған бир сотта 15 йиллиқ кесиветилгәнлик хәвири оттуриға чиқти. Әзимәт әнвәрниң канададики һаммиси мунәввәр турсунғоҗаниң радийомизға баян қилишичә, мәзкур сот өткән айниң дәсләпки һәптиси ечилған; сотқа әзимәт әнвәрниң аниси вә сиңлиси қатнашқан, сотта адвокат ишлитилмигән; мәһкум аилә-тавабиатлириға язма һөкүмму берилмигән. Учур сотқа қатнашқанлардин биваситә әмәс, васитилик йоллар билән елинғанлиқи үчүн сотниң рәсмий сот мәһкимисидә ечилғанлиқи яки түрмидә ечилғанлиқи мәлум әмәс. Телефонимизни қобул қилған қорғас наһийәлик сот мәһкимиси телефон арқилиқ һәрқандақ бир дело һәққидә мәлумат берәлмәйдиғанлиқини ейтти. Ғулҗа шәһәрлик сот мәһкимисиму, бу делоларниң дөләт мәхпийәтликигә ятидиғанлиқини әскәртип соаллиримизға җаваб бәрмиди.

Бүгүн, йәни 12-июн күни зияритимизни қобул қилған адвокат майкил полак, хәвәр раст болған тәқдирдә буниң уйғур райони вәзийити һәққидә чиқиватқан-пүтүнләй бигунаһ кишиләрниң узун муддәтлик кесилип кетиватқанлиқи һәққидики хәвәрләрниң тоғрилиқини дәлилләйдиғанлиқини тилға алди. Майкил полак, йеқинда д в ахбаратида елан қилинған «шинҗаңдики сахта сотлар» намлиқ хәвәрдин нәқилләр кәлтүрүп, түрмиләрдә уйғур тутқунларға, җинайәтләр тизимликини тутқузулуп, буниңдин бирқанчини таллап қол қоюшқа мәҗбурлиниватқанлиқини әслитип өтти. Әзимәт әнвәрниңму мушу хил қисмәткә дуч кәлгәнлик еһтималлиқини ишарәтлигән майкил полак, уйғур районида нөвәттә йолға қоюлуватқан бу иҗраатларниң инсанийәткә қарши бир җинайәт икәнлики, буниңға әркин дуняниң тамашибин сүпитидә қарап турмаслиқи керәкликини тәкитлиди. Б д т мәҗбурий ғайиб қиливетилгәнләр вә халиғанчә тутқун қилинғанлар ишханисиниң хәтлиригә хитай тәрәпниң техичә җаваб қайтурмиғанлиқини тилға алған майкил полак хәлқара җамаәтни хитайға қарита бу һәқтә давамлиқ бесим ишлитишкә чақирди. У сөзиниң ахирида әзимәт әнвәр вә әнвәр турсунғоҗаниң дәрһал қоюп берилиши, аилиси билән җәм болуши вә нормал иш-оқитини давамлаштурушиниң уларниң толиму әқәллий һәққи икәнликини тәкитләп, өзиниң, бу дада-балиниң һәқ-һоқуқи үчүн башлиған һәрикитини йәнә давамлаштуридиғанлиқини баян қилди.

Мунәввәр турсунғоҗа ханимму, чәтәлдики уруқ-туғқанларниң, мәзкур сот хәвиридин кейин бу делони техиму кәң хәлқаралаштуруш үчүн техиму актип вә тәсирлик бир һәрикәткә өтүш нийити вә ирадисигә кәлгәнликини баян қилди.

Һөрмәтлик радио аңлиғучилар, юқирида, түркийәдә оқуғанлиқи үчүн тутқун қилинған әзимәт әнвәрниң 15 йиллиқ кесиветилгәнлик учуриниң оттуриға чиққанлиқи вә бу әһвалға қарита униң чәтәлдики уруқ-туғқанлири вә адвокат майкил полакниң инкасини диққитиңларға сундуқ.

Пикирләр (0)
Share
Толуқ бәт