Jineste toxti ayup xanimning “Balilar nota kitabi” neshr qilindi

Ixtiyariy muxbirimiz azigh
2022.07.22
Jineste toxti ayup xanimning “Balilar nota kitabi” neshr qilindi Firansiyede turushluq Uyghur muzikant jineste toxti ayup xanim. 2022-Yili iyul.
RFA/Azigh

Yéqinda firansiyede turushluq Uyghur muzikant jineste toxti ayup xanimning balilar üchün tüzüp chiqqan “Balilar nota kitabi” teklimakan Uyghur neshriyati teripidin neshr qilin'ghan.

Kitabqa “Sadir palwan qoshaqliri”, “Qara-qara qushlarim”, “Anam méni ay deydu” qatarliq 15 parche Uyghurche balilar naxshiliri we mezkur naxshilarning notiliri kirgüzülgen.

Mezkur kitabning aptori jineste toxti ayup xanim “Balilar nota kitabi” ni tüzüshtiki meqsiti heqqide toxtaldi. U balilargha muzika ders bérish jeryanida Uyghurche balilar naxshiliri notilirining intayin kemchilikini hés qilghanliqini, Uyghur tarixi, til we medeniyitini saqlap qélish bilen bir waqitta notilar arqiliq Uyghur sen'itini saqlap qélishining intayin muhim ikenlikini éytti.

Firansiyede turushluq Uyghur muzikant jineste toxti ayup xanimning balilar üchün tüzüp chiqqan “Balilar nota kitabi” bir ösmürning öginish üstilide. 2022-Yili iyul.

Mezkur kitabning ongushluq chiqishi üchün Uyghur pérojékit fondi maddiy we meniwi jehettin yardem qilghan bolup, Uyghur pérojékit fondining qurghuchisi erkin sidiq ependi bu türge yardem bérishtiki meqsiti toghrisida toxtaldi. Shuning bilen birlikte yene, Uyghur balilirigha Uyghur sen'itini singdürüshning zörüriyitini tekitlidi.

Xitayning Uyghur élidiki sistémiliq qirghinchiliq siyasiti tüpeyli Uyghur medeniyiti we sen'itining éghir buzghunchiliqqa uchrawatqanliqi melum. Uyghur élining dunya bilen bolghan alaqisining tosqunluqqa uchrishi seweblik, muhajirettiki Uyghurlarning wetini bilen bolghan medeniyet we sen'et alaqisi pütünley üzülgen. Közetküchiler, muhajirettiki Uyghurlarning milliy mewjutluqini saqlishi üchün balilarni Uyghur medeniyiti we sen'iti bilen terbiyeleshning muhimliqini tekitlimekte.

Igilinishiche, mezkur kitab muhajirettiki Uyghurlar teripidin neshr qélin'ghan tunji Uyghurche nota kitabi bolup, yawropa Uyghur ansambilining yétekchisi muxter abdukérim janbaz ziyaritimizni qobul qélip, Uyghur sen'itining balilarni terbiyelesh we milliy kimlik yétishtürüshtiki roli heqqide toxtaldi.

Jineste xanim kitab neshr qilinip tarqitilghandin kiyin, ata-anilar we balilardin ijabiy bahalarning kelgenlikini, özining kitabning ikkinchi qismini ishlesh üchün tirishiwatqanliqini éytti.

Jineste xanim yene balilarni sen'et bilen terbiyeleshning muhim ikenlikini tekitlep mundaq dédi: “Muzika insan'gha maddiy we meniwi jehettin intayin paydiliq. Muzika balilarning ong we sol méngisining tereqqi qilishida muhim rol oynaydu we insan'gha ishench ata qilidu. Shunga muzika balilar üchün bek muhim. Chünki kelgüsimiz sebiy ghunchilirimizda”.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.