Пәрзәнтлиридин хәвәр алалмиған 5 уйғур аял б д т ға тәләп сунди

Ихтиярий мухбиримиз арслан
2021-03-24
Share
Балилири үчүн әнқәрәгә қарап йолға чиққан анилар сақчилар тәрипидин истанбулға қайтуруветилди 8-Март аяллар байрими күни йиллардин буян пәрзәнитлири һәққидә учур алалмайватқан бирқисим анилар истанбулдин әнқәрәгә пиядә меңип берип түркийә һөкүмитигә авазини аңлитишни мәқсәт қилған. 2021-Йили 8-март. Түркийә.
RFA/Ehsan

Истанбулдин әнқәрәгә пиядә йүрүп йетип барған 5 нәпәр уйғур аял өзлириниң юртлирида қалған, 5 йилдин буян алақә қилалмиған вә һечқандақ учур алалмиған пәрзәнтлириниң из-дерикини елип беришни тәләп қилип, бирләшкән дөләтләр тәшкилати тәрәққият программисиниң әнқәрәдики ишханисиға илтимас сунған.

Бу бәш аялниң бири болған қәлбинур турсунниң билдүрүшичә, бирләшкән дөләтләр тәшкилати тәрәққият программисиниң әнқәрәдики шөбә әмәлдарлири бир һәптә ичидә җаваб беридиғанлиқини билдүргән.

22-Март дүшәнбә күни уйғур аяллар бирләшкән дөләтләр тәшкилати тәрәққият программисиниң әнқәрәдики ишханиси алдида ахбарат елан қилиш йиғини уюштурған. Ахбарат елан қилиш йиғиниға түркийәниң анадолу агентлиқи вә германийәниң телевеизийә қанили болуп, бир қанчә ахбарат органлириниң мухбирлири қатнашқан.

Ахбарат елан қилиш йиғинида сөз қилған рәйһан әхмәт ханим өзиниң 18 яштин кичик баллиридин бәш йилдин буян һечқандақ хәвәр алалмиғанлиқини билдүрди. Рәйһан ханим 2016-йили түркийәгә қанунлуқ йоллар билән кәлгән болуп, һаяти бойичә һечқандақ дөләтниң қануниға хилаплиқ иш қилип бақмиғанлиқини билдүрди. У: "мән пәқәт бир ана сүпитидә яшашни халаймән. Өз баламниң авазини аңлашни халаймән. 5 Йилдин буян түркийәдә яшаватимиз, бирақ юртимизда қалған 8-9 яшлиқ баллиримиздин хәвәр алалмидуқ. Биз анилар үчүн бу әһвал бәк еғир келиватиду. Ата-аниси йенида болмиған бигунаһ мәсум баллиримиз қәйәрдә, қандақ бир һаят яшаватиду? буни билмәймиз," деди.

Рәйһан ханим 3 йилдин буян баллирини сүрүштә қилип қануний йоллар арқилиқ илтимас сунуп келиватқанлиқини, хитайниң истанбулдики консолханисиға илтимас сунғанлиқини, бирақ һечқандақ бир шәкилдә җавабқа еришәлмигәнликини билдүрди.

Рәйһан ханим дуня җамаитини ярдәмгә чақирип мундақ деди: "баллиримиздин айрилип қалдуқ, бизниңму башқа инсанларға охшаш баллиримизниң авазини аңлаш, улар билән биргә яшаш һәққимиз йоқму? пүткүл дунядики инсанлардин, кишилик һоқуқ қоғдуғучилиридин, аялларниң һәқ-һоқуқлирини қоғдуғучилардин, б д т мусапирларни қоғдаш кишилик һоқуқ комитетидин, пүтүн дөләт рәһбәрлиридин, дунядики пүткүл анилардин ярдәм тәләп қилимиз. Улардин игә-чақисиз, ялғуз қалған балилиримизға ярдәм қилишини, һеч болмиғанда балилиримизниң авазини аңлашқа, уларниң һаят яшаватқанлиқиниң хәвирини уқишимизға ярдәм қилишлирини тәләп қилимиз."

Әнқәрәдики ахбарат елан қилиш җәрянида аминә муһәммәд исимлик бир аялниң әһвали туюқсиз өзгирип, йәргә йиқилип чүшкән. Қәлбинур ханим, аминә ханимниң балилириниң дәрдидә бир қанчә қетим мушундақ туюқсиз әс-һушини йоқитип йиқилип чүшкәнликини, әмма һазир әһвалиниң яхши икәнликини билдүрди.

Қәлбинур турсун ханим әнқәрәгә келиштики мәқсити тоғрисида тохтилип, өзлириниң балилириниң из-дерикини елиш үчүн ялғуз түркийәниң һөкүмәт рәһбәрлири биләнла әмәс, бәлки америка, әнгилийә, германийә қатарлиқ дөләтләрниң әнқәрәдики әлчиханилириға ярдәм тәләп қилип илтимас сунуш үчүн истанбулдин әнқәрәгә кәлгәнликини, шу қатарда б д т ниң әнқәрәдики ишханисиғиму илтимас сунғанлиқини билдүрди.

Бир қанчә йиллардин буян пәрзәнтлириниң из-дерикини алалмиған бу уйғур анилар 25-март күни хитай ташқий ишлар министери ваң йи әнқәрәгә кәлгәндә балилирини сорүштә қилидиғанлиқини тәкитлиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт