Gérmaniye parlaméntida ötküzülgen “Diktator döletlerning chégra halqighan basturush siyasiti” namliq yighinda Uyghurlar mesilisi muzakire témisi boldi

D u q re'isi turghunjan alawudun we d u q ning sabiq re'is dolqun eysa bashchiliqidiki bir guruppa Uyghur wekiller 17-dékabir gérmaniye paytexti bérlin'gha kélip, gérmaniye parlaméntida ötküzülgen “Diktator döletlerning chégra halqighan basturush siyasiti” namliq yighin'gha qatnashqan. Mezkur yighin'gha gérmaniye parlamént ezaliridin terkib tapqan “Uyghur dostluq guruppisi” ning ezaliri, mutexessisler, tetqiqatchilar, xongkong, teywen, wéytnamliq kishilik hoquq pa'aliyetchiliri bolup köp sandiki kishiler qatnashqan.

Yighinda d u q ning sabiq re'isi dolqun eysa ependi söz qilip, 8-nöwetlik d u q ning omumiy yighinida saylam arqiliq wujudqa kelgen d u q ning yéngi rehberlik hey'itini tonushturup ötken hemde xitayning d u q ning 8-nöwetlik qurultiyini buzush üchün qollan'ghan chégra halqighan basturush siyasetliri heqqide melumatlar bergen.

Bérlindin bu xususta bizni uchur bilen teminligen d u q re'isi turghunjan alawudun ependining bildürüshiche, bu yighinda Uyghurlar mesilisi nuqtiliq témilardin biri süpitide otturigha qoyulghan. D u q ning mu'awin re'isi zumret'ay erkinmu bu heqte qarashlirini ipade qilip ötti.

D u q wekillirining bu qétimqi bérlin ziyariti gérmaniyede hakimiyet béshidiki birleshme hökümet kirizisqa pétip tarqitiwétilgen bir mezgilge toghra kelgen. D u q ning sabiq re'isi dolqun eysa ependining bayan qilishiche, hökümetning emeldin qélishi gérmaniyediki Uyghur dewasigha belgilik selbiy tesirler körsitidiken. Uning eskertishiche, aldimizdiki ayda ötküzülidighan saylamda qandaqla bir hökümet hakimiyet béshigha chiqmisun, gérmaniye parlaméntidiki “Uyghur dostluq guruppisi” ni yene qaytidin qurup chiqish üchün tirishchanliq körsitishke toghra kélidiken.

D u q ijra'iye komitétining mu'awin re'isi erkin zununning bildürüshiche, bu yighin esnasida xitayning gérmaniyediki 5 dane mexpiy saqchi ponkitining taqiwétilgenliki we xitayning chégra halqighan basturushlirining tehditlirige duch kelgüchiler üchün hökümetning mexsus bir téléfon liniyesi berpa qilghanliqi melum bolghan.

D u q wekillirining bergen melumatlirigha qarighanda, ular bügün 18-dékabir küni gérmaniye tashqi ishlar ministirliqida bezi hökümet xadimliri bilen ichki uchrishishlarni ötküzgen.