Héytgah meschitining xitay kommunist hakimiyitini yaqilighuchi xatibi öltürülgen

Charshenbe küni etigende, xitay döletlik we Uyghur aptonom rayonluq islam jem'iyitining mu'awin re'isi, héytgah meschitining xatibi jüme tahir öltürülgen.

Melum bolushiche weqe héytgah meschitining aldida yüz bergen, weqedin kéyin qeshqer shehirige kirip-chiqish cheklen'gen, sheherde dukanlar taqalghan. Sheher asminida charlash élip bériwatqan tik uchar ayropilanlar we adettin tashqiri kücheytilgen bixeterlik tedbirliri, jüme tahirni öltürgen hujumchilarning téxi tutulmighanliqidin isharet bermekte.

Jüme tahirning 5‏-iyul weqesi we sériqbuya weqesi qatarliq weqelerde xitay terepte turup pozitsiye bildürgenliki üchün Uyghur jem'iyitining küchlük naraziliqigha uchrighanliqi ilgiri sürülgen idi.

Roytrurusning bügünki Uyghurlar heqqidiki xewiride bayan qilinishiche, fransiyelik bir sayahetchi qeshqer héytgahning aldida qan ichide yatqan bir kishini we qolida pichaq tutqan halda qéchip kétiwatqan ikki kishini körgen.

Fransiyelik sayahetchi yene chüshtin kéyinde qeshqer sheher ichige köp sanda qoralliq qisim eskerlirining sheherge kiriwatqanliqini körgen we oq awazini anglighan.

Biz roytérsning xewiridiki bu yip uchigha asasen, qeshqer shehiridiki ahaliler we xadimlargha téléfon qilduq.

Qeshqerge sayahetke kelgen bir Uyghur sayahetchi, sheherge ichige kirgüzülmey 8 sa'et sheher sirtida saqlighanliqi we kechqurun sheherge kirishige ruxset qilin'ghan bolsimu méhmanxanigha élinmighanliqini bayan qildi. Uning bayan qilishiche, bügün qeshqerde dukanlar taqalghan, kochilardin ademler tarqitiwétilgen. Bu Uyghur sayahetchi bir emeldar dostining yardimi bilen bir méhmanxanigha orunlashqan. Melum bolushiche saqchilar méhmanxanilarni 3 kün'giche xéridar qobul qilmasliqqa buyrughan. Téléfonimizni qobul qobul qilghan ahalilerdin biri bügün qeshqer asminida tik'ucharning pes halette uchup charlash élip barghanliqini we sheherde weziyetning alahide jiddiy ikenlikini bayan qildi. Ahalilerdin 3 kishi, héytgah meschitining xatibi jüme tahirning bügün etigen öltürülgenlikini melum qildi.

Yuqiriqi melumatlar, bügün roytérsqa chiqqan xewerdiki firansiyelik yoluchi teminligen uchurlarning toghriliqini ispatlimaqta. Mezkur sayahetchining bayanliridin qarighanda, hujumchilar ikki neper bolup, ular jüme tahirni boghuzlap yaki chanap öltürgen. Emma gumandarlarning tutulup-tutulmighanliqi hazirche melum emes.