Qaramaydiki musulmanlarning meschit sélish ishi cheklimige uchrimaqta

Qaramay shehirige qarashliq 3-zawut meschitining ichki körünüshi. 2014-Yili noyabir.

Qaramay shehiridiki yerlik da'iriler 2007-yildin bashlap qaramay sheher kölimini kéngeytish meqsitide qaramay shehirige qarashliq 5-zawut, néfit sinash, 3-zawut qatarliq rayonlardiki ishchi -xizmetchiler ahalilirini qaramay sheher ichige köchürüp élip kirgen idi.

Da'iriler köchken rayonda xelqqe qulay orunlarning bolushigha kapaletlik qilish, bolupmu islam dinigha étiqad qilidighan ishchi-xizmetchiler üchün diniy pa'aliyet soruni bolghan hazirqi rayondiki meschitliri taqalsa, shuninggha oxshash shekildiki meschitlerni saldurup bérishke wedilerni qilghan idi.

Emma, hazir qaramay sheherlik yerlik da'irilerning qilghan wedisige 6 yildin ashqan bolsimu, 5-zawut we néfit sinash rayondiki meschitler taqalghan, emma uning ornigha qaramay sheher ichige meschit sélip bérish wedisi téxiche emeliyleshmigen.

Biz bu toghrisida melumat élish üchün qaramay shehirige qarashliq 3-zawut meschitining imamidin ehwal igileshke tirishtuq. Biz yenimu tepsiliy melumatqa érishish üchün 3-zawut meschiti idare hey'et mes'ul xadimi bilen söhbet élip barduq. Ularning inkas qilishiche, qaramay shehiridiki yerlik da'iriler “Qaramay shehirige meschit sélish ishlirida yer yoq, muqimliqqa tesir yétidu” dégendek bahaniler bilen meschit sélishni cheklep kelgen.