Ахбаратқа чиққандин кейин ача-сиңил мәһбусларниң пәрзәнтлири қисмән “ғәмхорлуқ” қа еришкән

Мухбиримиз шөһрәт һошур
2016-07-04
Share
mehelle-oynap-yurgen-bala.jpg Кочида ойнап йүргән қарақсиз уйғур балиси. 2013-Йили 8-ноябир, қәшқәр.
AFP

Өткән айда онсу наһийисиниң чағрақ йезисидики ели ясин вә униң икки сиңлиси рошәнгүл ясин, арзугүл ясинларниң аталмиш қанунсиз диний материялларни көргәнлики үчүн җорилири билән бирликтә йәттә йиллиқтин кесилгәнлики радийомиз тәрипидин ашкариланғандин кейин, бу әһвал вашингтон почтиси қатарлиқ бир қисим хәлқара ахбарат васитилиридә хәвәр қилинған иди. Йеқинда райондики әһвалдин хәвәрдар кишиләрниң радийомизға йәткүзүшичә, ача-сиңил мәһбусларниң әһвали ахбаратқа чиққандин кейин алақидар даириләр мәзкур үч аилиниң түрмә сиртидики әзалиридин һал сориған вә нопуссиз балиларни нопусқа, мәктәпсиз қалғанларни мәктәпкә орунлаштурған.

Әһвалдин хәвәрдар кишиләрниң мәктуп арқилиқ радийомизға ашкарилишичә, онсу наһийисиниң чағрақ вә тохула йезисидики ака вә ача-сиңил мәһбусларниң әһвали хәлқара ахбаратқа ашкариланғандин кейин, мәзкур наһийәдики алақидар даириләр, мәхсус хизмәт гурупписи әвәтип, юқириқи үч аилиниң түрмә сиртидики әзалири һәққидә тәкшүрүш елип барған вә бу тәкшүрүшниң нәтиҗисидә, уларниң пәрзәнтлири аталмиш ғәмхорлуққа еришкән. Биз бу учурниң тоғра-хаталиқини ениқлаш үчүн мәзкур йезидики бир кәнт секретарини зиярәт қилдуқ. У юқириниң орунлаштуруши бойичә йеқинда бу аилиләргә әһвал сорап барғанлиқи вә уларниң бир қисим қийинчилиқлирини һәл қилғанлиқини баян қилди. Униң дейишичә, һал сораш вә тәкшүрүштин кейин юқири орунларниң орунлаштуруши бойичә, мәһбус ели ясинниң нопуссиз бир балисини нопусқа алған, мәктәпсиз қалған икки балисини мәктәпкә орунлаштурған.

Йәнә әһвалдин хәвәрдар кишиниң радийомизға ашкарилишичә, арзугүл ясинниң вә һиҗрәт гумани билән тутулған гүлмирә исимлик мәһбусниң мәктәп йешиға тошмиған балилири әслидә һөкүмәт башқурушидики мәхсус бир бала тәрбийиләш орнида туруватқан болуп, бу балилар йеқинда уруқ-туғқанлириниң, җүмлидин бовисиниң вә момисиниң қолиға қайтуруп берилгән. Биз бу әһвални ениқлаш үчүн мунасивәтлик бир кәнт секретарға телефон қилғинимизда, у, бу балиларниң уруқ-туғқанлириға қайтурулғанлиқини дәлиллиди.

Телефон зияритимиз арқилиқ игиләнгән учурлардин, мәзкур мәһбус аилә-тавабиатлириниң әһвалидики бу кичиккинә иҗабий өзгиришниң, әһвалдин хәвәрдар киши дегәндәк, вәқәниң ахбаратқа чиқиши билән мунасивити бар-йоқлуқи мәлум әмәс, әмма мәзкур өзгиришниң вәқә ахбаратқа ашкариланғандин кейин йүз бәргәнлики ениқ. Биз охшаш бир нәтиҗиниң башқа җайлардики мәһбус аилилиридиму йүз бәргән, бәрмигәнликини ениқлаш үчүн, мәкит наһийәсигә телефон қилдуқ. Өткән йили зияритимизни қобул қилған бәш мәһбус аилә тавабиати вәқәниң ахбаратқа чиқишиниң өзлиригә һечқандақ иҗабий яки сәлбий тәсири болмиғанлиқини, пәқәт рәсим әвәткүчигә 5000 сом җәриманә қоюлғанлиқини, бу җәриманини бәш мәһбус аилисиниң өз-ара һәмкарлишип төливәткәнликини ашкарилиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт