7-Нөвәтлик дуня уйғур қурултийиниң вәкилләр сайлими хәлқара мәтбуатлардин орун алди

Ихтиярий мухбиримиз әкрәм
2021.08.24
Share on WhatsApp
Share on WhatsApp
7-Нөвәтлик дуня уйғур қурултийиниң вәкилләр сайлими хәлқара мәтбуатлардин орун алди Д у қ ниң 7-нөвәтлик қурултийиға вәкил сайлаш паалийитидә сайламға назарәтчилик вә риясәтчилик қилиш һәйити вә паалийәткә тәйярлиқ қилғучилар. 2021-Йили 22-авғуст, германийә.
RFA/Ekrem

22-Авғуст күни 25 дөләттә өткүзүлгән 7-нөвәтлик д у қ ниң вәкилләр сайлими хәлқара мәтбуатларниң диққитини җәлип қилди.

22-Авғуст күни 25 дөләттә өткүзүлгән 7-нөвәтлик д у қ ниң вәкилләр сайлими әркин асия радийосиниң уйғурчә вә ингилизчә сәһипилиридә хәвәр қилинғандин ташқири, бирқисим ғәрб мәтбуатлиридинму орун алди.

Германийәниң “нех 24” хәвәрләр сәһиписи 22-авғуст күни “уйғурлар пүтүн дуня миқясида өзлириниң вәкиллирини сайлиди” намлиқ хәвәр елан қилди. Хәвәрдә 25 дөләттики уйғур җамаитиниң демократик сайлам арқилиқ өзлириниң 200 нәпәр вәкилини сайлап чиққанлиқи, бу сайламниң бу йил 11-айда прагада өткүзүлидиған 7-нөвәтлик д у қ ниң паалийәтлириниң бир тәркибий қисми икәнлики, 2004-германийәниң мюнхен шәһридә қурулған д у қ ниң хитай коммунистик һакимийитигә қарши күрәш қиливатқан муһаҗирәттики уйғурларниң әң ғоллуқ тәшкилати икәнлики баян қилинған. Хәвәрдә йәнә нөвәттә шәрқий түркистанда милйонлиған уйғурларниң җаза лагерлирида азаб тартиватқанлиқи, бирақ хитай һакимийитиниң буни изчил инкар қилип келиватқанлиқи, уйғурлар үстидә мәҗбурий әмгәк, пиланлиқ туғут вә мәҗбурий туғмас қилиш қатарлиқ паҗиәләрниң йүз бериватқанлиқиниң мәтбуатлар тәрипидин көпләп тилға елиниватқанлиқи, бир қисим ғәрб әллириниң буни “ирқий қирғинчилиқ” дәп атиғанлиқи илгири сүрүлгән.

Д у қ ниң 7-нөвәтлик қурултийиға вәкил сайлаш паалийитидә сайламға назарәтчилик вә риясәтчилик қилиш һәйитиниң назарәтчиликидә биләт ташланмақта. 2021-Йили 22-авғуст, германийә.
Д у қ ниң 7-нөвәтлик қурултийиға вәкил сайлаш паалийитидә сайламға назарәтчилик вә риясәтчилик қилиш һәйитиниң назарәтчиликидә биләт ташланмақта. 2021-Йили 22-авғуст, германийә.

Д у қ рәиси долқун әйса әпәнди 7-нөвәтлик д у қ вәкилләр сайлиминиң хәлқара мәтбуатларниң диққитини җәлп қилишидики сәвәб һәққидә тохталғанда, буниң уйғур дәвасиниң хәлқарада тонулуш салмиқиниң ешиши билән мунасивәтлик икәнликини тилға алди. Д у қ ниң муавин рәиси пәрһат муһәммиди әпәндиму бу һәқтә қарашлирини оттуриға қоюп өтти.

24-Авғуст тәйвәндә нәширдин чиқидиған “минбав” ( “тәйвән авам гезити” ) му бу һәқтә “д у қ бу йил 11-айда 7-нөвәтлик вәкилләр қурултийини чақирмақчи” намлиқ тәпсилий хәвәр елан қилған. Хәвәрдә бу қетим өткүзүлгән вәкилләр сайлими тоғрисида д у қ баянатчиси дилшат решитни зиярәт қилғанлиқи, дилшат решитниң 11-айда пирагада өткүзилидиған 7-нөвәтлик д у қ ға көплигән дөләтләрдин уйғур вәкиллири келип қатнашқандин сирт, йәнә бәзи дөләтләрниң депломатлири, парламент әзалири вә даңлиқ сиясий шәхсләрниңму иштирак қилидиғанлиқини тилға алғанлиқи әскәртилгән.

Д у қ баянатчиси дилшат решит бу мунасивәт билән зияритимизни қобул қилғанда, 22-авғуст 25 дөләттә өткүзүлгән 7-нөвәтлик д у қ ниң вәкилләр сайлимиға көплигән дөләтләрниң ахбарат вастилириниң қизиқип, өзидин мәзкур сайлам тоғрисида мәлуматлар сориғанлиқини баян қилди.

Мәлум болғинидәк, д у қ 22-авғуст 25 дөләттә сайлам өткүзүп, 7-нөвәтлик қурултай үчүн өзини тизимға алдурған 300 дин артуқ вәкил намзатлири ичидин хәлқниң әркин ирадиси билән 200 нәпәр вәкилни сайлап чиққан иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.