تۆت يىل بۇرۇن دۇنيا ئۇيغۇر قۇرۇلتىيى ئەنگلىيە ھۆكۈمىتىنىڭ ئۇيغۇر رايونىدىن پاختا ئىمپورت قىلىش مەسىلىسىنى تەكشۈرمىگەنلىكىنى بىلدۈرۈپ ئەرز سۇنغان بولسىمۇ، ئەينى چاغدا ئەنگلىيە سوتى ھۆكۈمەتكە پايدىلىق قارار چىقارغان ئىدى؛ جۈملىدىن ئەنگلىيە سوتى قارارىدا «ئەگەر ئىمپورت قىلغۇچى ئورۇن ماللارنى بازار قىممىتى بويىچە سېتىۋالغان بولسا، ئۇ ھالدا ئۇ جىنايى ئىشلار قانۇنى بويىچە جىنايەت سادىر قىلغان ھېسابلانمايدۇ» دېيىش ئارقىلىق، ئىمپورت قىلغۇچى شىركەتلەر ۋە ھۆكۈمەتنى مەجبۇرىي ئەمگەك بىلەن ئەيىبلەشتىن قوغدىغان ئىدى.
بۇنىڭ نەتىجىسىدە دۇنيا ئۇيغۇر قۇرۇلتىيى ئەنگلىيە سوتىنىڭ قارارى ئۈستىدىن قايتا ئەرز سۇنغان بولۇپ، بۇ ھەقتىكى سوت ئۆتكەن ئاي ئىچىدە كۆرۈلگەن ئىدى.
نۆۋەتتە دۇنيا ئۇيغۇر قۇرۇلتىيى، يەر شارى قانۇن ھەرىكەت تورى (GLAN)، خەلقئارا قۇللۇققا قارشى تۇرۇش تەشكىلاتى قاتارلىقلار ئەنگلىيە يۇقىرى سوتىنى بۇ ھەقتىكى قارارىنى ئۆزگەرتىشكە قىستاش ئۈچۈن، ئۆز پائالىيەتلىرىنى كۈچەيتىشكە كىرىشكەن.
ئەنگلىيەدىكى خەلقئارا قۇللۇققا قارشى تۇرۇش تەشكىلاتى يېقىندا «مەجبۇرىي ئەمگەك بىلەن ياسالغان مەھسۇلاتلار نېمىشقا چەكلىنىشى كېرەك» ماۋزۇلۇق بىر قىسقا فىلىم تارقىتىپ، تېخىمۇ كۆپ كىشىلەرنى ئۇيغۇر مەجبۇرىي ئەمگەك مەھسۇلاتلىرىنى چەكلەش سېپىگە قېتىلىشقا ۋە ھۆكۈمەتكە چاقىرىق قىلىشقا ئۈندىگەن. ئۇلار بۇ قىسقا فىلىمدا ئەنگلىيە سوتى ئىلگىرى سۈرگەندەك، «مەجبۇرىي ئەمگەك بىلەن ياسالغان تاۋارلاردا ئادىل باھا بولمايدىغانلىقىنى، مەجبۇرىي ئەمگەك تاۋارلىرىغا بازار قىممىتى بويىچە مۇئامىلە قىلىشقا بولمايدىغانلىقى» ئەسكەرتكەن ۋە بۇ مەھسۇلاتلارنىڭ چەكلىنىشى لازىملىقىنى ئوتتۇرىغا قويغان.
خەلقئارا قۇللۇققا قارشى تۇرۇش تەشكىلاتىنىڭ رادىيومىزغا بىلدۈرۈشىچە، ئەنگلىيەدە ھەر قايسى تەرەپلەر ئۇيغۇر خەلقىنىڭ كىشىلىك ھوقۇق دەپسەندىچىلىكىگە ئۇچراۋاتقانلىقى ۋە مەجبۇرىي ئەمگەككە سېلىنىۋاتقانلىقى مەسىلىسىدە بىرلىككە كەلگەن بولسىمۇ، بىراق ئەنگلىيە سوتى يەنىلا ھۆكۈمەتنى قوللاپ قارار چىقارغان. ئۇلار ئېلخەت ئارقىلىق قايتۇرغان ئىنكاسىدا مۇنداق دېگەن:
«سوت ئۇيغۇر رايونىدا يولغا قويۇلۇۋاتقان ئېغىر كىشىلىك ھوقۇق دەپسەندىچىلىكىگە ئەھمىيەت بېرىشنىڭ ئورنىغا، رايوندىن كەلگەن ۋە مەجبۇرىي ئەمگەك بىلەن ياسالغان مەھسۇلاتلارنى تەكشۈرۈش ئۈچۈن دۇنيا ئۇيغۇر قۇرۇلتىيىدىن كونكرېت پوسۇلكىنى كۆرسىتىشنى، ئەۋەتىلگەن ماللارنىڭ پوچتا يوللانمىسىغا ئائىت قوشۇمچە ماتېرىياللار بىلەن تەمىنلەشنى تەلەپ قىلدى. ئۇلار ھەتتا ئىمپورت قىلغۇچى مەھسۇلاتنى بازار قىممىتىدە سېتىۋالغان بولسا، بۇ ئادالەتسىز تىجارەتكە كىرمەيدۇ ۋە ھېچقانداق قانۇنغا خىلاپلىق قىلغانلىق بولمايدۇ، دېدى. ئەگەر بۇ ھۆكۈم ئاغدۇرۇلمايدىغان بولسا، ئۇ ھالدا ئەنگلىيە مەجبۇرىي ھالدا ئىشلەپچىقىرىلغان تاۋارلارنىڭ بازىرىغا ئايلىنىپ قېلىشى مۇمكىن، ئۇندىن سىرت ھەتتا مەجبۇرىي ئەمگەك مەھسۇلاتلىرىغا باھا پىچىلىدىغان قاراشمۇ پەيدا بولۇشى مۇمكىن. بىز مەجبۇرىي ياسالغان ھەر قانداق تاۋارنىڭ ئادىل باھاسى يوق دەپ قارايمىز. »
مەزكۇر تەشكىلات قىسقا فىلىمىدىمۇ ئەگەر ئەنگلىيە ھۆكۈمىتى مەجبۇرىي ئەمگەكنى چەكلەيدىغان تەدبىر قوللانمىسا، ئۇ ھالدا بۇنىڭ ئۇيغۇرلارغا كەڭ كۆلەمدە زىيانكەشلىك قىلىۋاتقان خىتاي ھۆكۈمىتىنى ھەمدە بۇ زىيانكەشلىكتىن نەپ ئېلىۋاتقان شىركەتلەرنى قوللىغانلىق بولۇپ ھېسابلىنىدىغانلىقىنى ئەسكەرتكەن.
خەلقئارا قۇللۇققا قارشى تۇرۇش تەشكىلاتىنىڭ رادىيومىزغا دېيىشىچە، ئەنگلىيەنىڭ مەجبۇرىي ئەمگەك ئارقىلىق ياسالغان تاۋارلارنى تۆكمە قىلىپ ساتىدىغان جايغا ئايلىنىپ قېلىشىنىڭ ئالدىنى ئېلىش ئۈچۈن، ئۇلار سايلام مەزگىلىنى چىڭ تۇتۇپ ھەرىكەت قىلىدىكەن. تەشكىلاتنىڭ ئاخباراتقا مەسئۇل خادىمى جېسسىكا تۇرنىر ئېلخېتىدە مۇنداق دېگەن:
«بىز ھازىر سايلام مەزگىلىدە تۇرۇۋاتىمىز، بىز 7-ئايدا ھاكىمىيەت بېشىغا چىقىدىغان ھۆكۈمەتنىڭ مەجبۇرىي ئەمگەككە تاقابىل تۇرۇشنى ئالدىنقى ئورۇنغا قويۇشىنى ۋە يېقىن قوشنا دۆلەتلەرنىڭ بازارلىرىغا ماس ھالدا دۆلەت قانۇنى تۈزۈشىنى كۈچلۈك تەلەپ قىلىمىز. »
مەلۇم بولۇشىچە، بۇ ئورگان 6-ئىيۇن كۈنى مەخسۇس مۇشۇ ھەقتە بىر مۇھاكىمە يىغىنى ئۇيۇشتۇرغان بولۇپ، يىغىندا دۇنيا ئۇيغۇر قۇرۇلتىيى ئەنگلىيە ئىشخانىسىنىڭ مۇدىرى رەھىمە مەھمۇت خانىم سۆزگە تەكلىپ قىلىنغان.
رەھىمە خانىمنىڭ ئېيتىشىچە، يىغىندا ئەنگلىيەدە مەجبۇرىي ئەمگەكنى چەكلەشكە دائىر قانۇن تۇرغۇزۇپ چىقىشنىڭ ئەھمىيىتى، ئۇنىڭ قانۇنىي ئاساسلىرى ھەققىدە مۇزاكىرىلەر بولغان. كىشىلىك ھوقۇق ۋە سىياسەت ساھەسىدىكى شەخسلەر دۇنيا ئۇيغۇر قۇرۇلتىيى ئەنگلىيە ئىشخانىسىنىڭ ئەنگلىيە ھۆكۈمىتىنىڭ مەجبۇرىي ئەمگەكنى چەكلەشتىكى يېتەرسىزلىكىنى ئەيىبلەپ، ئۇنى سوتقا بېرىشى ۋە ئەنگلىيە سوتىنىڭ قارارىغا نارازىلىق بىلدۈرۈش ھەرىكىتىنىڭ ئىنتايىن مۇھىم ئەھمىيەتكە ئىگە ئىكەنلىكى ھەم شۇنداقلا ئىلگىرى بولۇپ باقمىغان بىر ھەرىكەت بولغانلىقىنى بىلدۈرگەن.
مەلۇم بولۇشىچە، ئەنگلىيە تارىخىدىكى تۇنجى قېتىملىق ھادىسە بولغان بۇ قېتىملىق سوت گۇۋاھلىقى مۇنازىرىسىدە كىشىلىك ھوقۇق تەرەپدارلىرىنىڭ ئۇتۇپ چىقىدىغانلىقى يۇقىرى ئېھتىمال دەپ قارالماقتىكەن.