Радийомиз тәһрири әсәт сулайманниң тутқундики укиси әхмәт сулайман қоюп берилгән

Радийомиз тәһрири әсәт сулайманниң йеқин уруқ-туғқанлиридин 7 кишиниң тутқунда икәнилки, булардин үчиниң кесиветилгәнлики бу йил февралниң ахириқи һәптисидики ениқлашлиримиз давамида дәлилләнгән иди. Бүгүнки ениқлашлиримизда булардин пәқәт бириниң, йәни сабиқ йеза башлиқи әхмәт сулайманниң йеиқинда қоюп берилгәнлики алақидар хадимлар тәрипидин ашкариланди

Һөрмәтлик радийо аңлғучилар, радийомиз тәһрири әсәт сулайманниң уруқ-туғқанлиридин 7 кишиниң тутқунда икәнлики дәлилләнгәндин кейин, биз уларниң делосиниң тәрәққияти вә саламәтлик әһвали һәққидә давамлиқ ениқлаш елип бардуқ. Телефонимизни қобул қилған қумул шәһәр тәңритағ йезилиқ һөкүмәтниң бир хадими әсәт сулайманниң иниси, сабиқ йеза башлиқи әхмәт сулайманниң йеқинда қоюп берилгәнликини ашкарилиди. Биз униңдин әхмәт сулайман билән йүз көрүшкән-көрүшмигәнликини сориғинимизда, у лагер яки түрмидин чиққан кишиләрни йоқлашқа болмайдиғалиқини билдүрди.

Биз бу учурниң тоғрилиқини техиму айдиңлаштуруш үчүн әхмәт сулайман хизмәт ишлигән тәңритағ йезисидики кәнт мәсуллириға телефон қилдуқ. Алақидар хадимлардин бири әхмәт сулайманниң буниңдин бир айчә аввал қоюп берилгәнлики вә нөвәттә етиз-ериқ ишлири билән мәшғул икәнликини ашкарилиди.

Өткәнки ениқлашлиримизда әсәт сулайманниң акиси әһәт сулайман, иниси әхмәт сулайман һәмдә нәврә қериндашлиридин җелил осман, муһәммәт осман, ели аблелим, аблаҗан аблелим вә адил аблелимләрниң тутқунда икәнлики дәлилләнгән болсиму, әмма уларниң немә үчүн тутулғанлиқи, йәни тутулушиға нимиләрниң баһанә қилинғанлиқи айдиңлашмиған иди. Шу қетимда тәңритағ йезилиқ сақчи хадими әхмәт сулайманниң дөләт бихтәрлик сақчилири тәрипидин тутулғанлиқини ашкарилиған вә униң тутулуш сәвәбидин йеза дәриҗиликтин юқури әмәлдарларниңла хәвәрдар икәнликини ейтқан иди.

Мәзкур кәнт хадими хизмәт чәмбирикидин аңлиғанлириға асасән, әхмәт сулайманниң компйотеридин "чатақ" чиқип тутулғанлиқини илгири сүрди.

Һөрмәтлик радийо аңлиғучилар, илгирики ениқлашлиримизда мәшһур хәйр-сахавәтчи нуртай һаҗи қатарлиқ көп санда тутқунларниң бир қетим қоюп берилип қайтидин тутулғанлиқи вә һәтта узун муддәтлик кесиветилгәнлики мәлум болған иди. Қоюп берилиши радийомиз зияритидин 10-15 күн кейингә тоғра кәлгән әхмәт сулайманниң қисмитидики бу өзгиришкә неминиң тәсир қилғанлиқи һазирчә мәлум әмәс. Илгири уйғур көзәткүчиләр, қанун билән башқурулмайватқан бир дөләттики делоларда тасадипий нәтиҗиләрниң һәр вақит болуп турудиғанлиқи, болупму ирқий қирғинчилиқни иҗра қиливатқан хитайдәк бир дөләттә тутулуш вә қоюп берилишниң пәқәт йәрлик әмәлдарларниң хаһши вә пәйли билән алақидар икәнликини илгири сүрүшкән иди.

Буни бесиш арқилиқ, пикриңизни йезиң

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар