“дуня” гезити гүлбаһар җелилованиң өйини көзәткән кишиләрниң хитай дөләт хәвпсизлик органлириға тәвә кишиләр икәнликини ашкарилиған

Вашингтондин мухбиримиз нуриман тәйярлиди
2024.05.23
qara-van-kishiler Гүлбаһар җелилова ханимниң өйиниң алдида тохтитип қоюлған қара рәңлик машина вә униң әтрапида турған қара кийимлик адәмләр. 2024-Йили 8-май, париж
Дилнур рәйһан

Фирансийәдә чиқидиған “дуня” гезитиниң 18-май күни елан қилған хәвиригә қариғанда, фирансийә ичкий хәвпсизлик баш идариси (DGSI) билән париж сақчи идариси, 8-май күни гүлбаһар җилиловани өз ичигә алған париждики уйғур сиясий мусапирлириға қарита елип берилған “қорқутуш һәрикити” дә, хитай дөләт хәвпсизлики органлириға тәвә кишиләрниң қоли барлиқини ашкарилиған.

Хәвәрдә йәнә хитай дөләт хәвпсизлики хадимлириниң аммиви сорунларда һәрикәт қилғанлиқи, уларниң һәрикәтлиригә фирансийә сақчилири арилашқандин кейинму өз һәрикәтлирини давамлаштурғанлиқи әскәртилгән.

Ши җинпиңниң явропа зиярити давам қиливатқан пәйттә, йәни 8-май күни париж вақти 11 ләрдә кимлики намәлум қара кийимлик сәккиз киши қара кичик аптомобил билән лагер шаһити гүлбаһар җелилова ханимниң өйиниң алдиға кәлгәниди. Улар гүлбаһар ханимниң өйиниң қоңғуриқини нәччә қетим басқан вә ян телефониғиму нәччә қетим телефон қилған. Әйни вақитта гүлбаһар ханим сиртқа чиқип кәткән болуп, бу әһвални байқиған қошнилири уни өйигә қайтмаслиққа агаһландурған.

Әйни вақитта гүлбаһар ханим арқа-арқидин йүз бәргән паракәндичилик түпәйли кәйпияти бәк начар болғачқа соаллиримизға җаваб берәлмәй қалғаниди. У бүгүн радийомизниң зияритини қобул қилип, 8-май күни өзиниң бешиға кәлгән әһвалларни тәпсилий аңлатти.

Фирансийәдики актип паалийәтчи, явропа уйғур институтиниң мәсули доктор дилнур рәйһан ханим бу вәқә һәққидә испат топлап сотқа әрз қилишқа тәйярлиниватқан болуп, у бу һәқтә радийомизға қисқичә мәлумат бәрди. У 8-май күни гүлбаһар ханимға қилинған паракәндичиликниң мәқсити һәққидә сақчиларниң уларға техи ениқ бир җаваб бәрмигәнликини билдүрди.

Гүлбаһар ханим “дуня” гезити ашкарилиған учурлардин өз изиға чүшкән йочун адәмләрниң хитай дөләт хәвпсизлики идарисигә тәвә кишиләр икәнликини билгән. Бу һәқтә тохтилип мундақ деди: “биз лагер шаһитлирида хитайниң уйғурларға йүргүзүватқан җинайәтлири тоғрилиқ нурғун испатлар бар. Шуңа хитай бизни қорқутуп гуваһлиқ бәргүзмәсликкә тиришиватиду.”

Дилнур ханимниң ейтишичә, фирансийә һөкүмәт тәрәп бу вәқәгә қарита һечқандақ инкас билдүрмигән. У бу һәқтә тохтилип, “макрон һөкүмити ши җинпиңни рәнҗитип қоймаслиқ үчүн бу ишта җим турди” дәп қарайдиғанлиқини билдүрди.

Гүлбаһар ханимниң ейтишичә, униңға натонуш номурлардин келидиған телефонлар йәнә давамлишиветипту. У һазир сиртқа көп чиқмастин наһайити еһтият билән һәрикәт қилидикән. У хитайниң суйиқәстлиридин сақлиниш үчүн, башқа лагер шаһитлириниңму һәр даим бихәтәрликигә диққәт қилишни тәвсийә қилди.

Биз бу дело һәққидә париж шәһәрлик сақчи идариси (préfecture de police de Paris) дин мәлумат елиш үчүн йәнә елхәт әвәттуқ, әмма улар бизниң зиярәт тәлипимизгә йәнә җаваб қайтурмиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.