Jenwediki b d t binasi aldida “Irqiy qirghinchiliq” qa qarshi resim körgezmisi bashlandi

D u q xitayning b d t diki saxta teshwiqatlirigha reddiye bérish üchün “Irqiy qirghinchiliq” qa qarshi resim körgezmisi pa'aliyiti uyushturdi.

Amérikaning shiwétsariyediki elchixanisining qollishi bilen d u q 16-séntebirdin bashlap jenwediki b d t binasi aldida “Irqiy qirghinchiliq” qa qarshi resim körgezmisi pa'aliyitini bashlighan. D u q ning mu'awin re'isi perhat muhemmidi ependining bildürishiche, 14-séntebir küni kechte jenwediki amérika elchixanisida bu qétimqi resim körgezmisining échilish murasi heywetlik ötküzülgen. Bu murasimgha 30 din artuq döletning bash elchiliri we déplomatliri bolup, 40 tin artuq kishi qatnashqan.

Jenwedin ziyaritimizni qobul qilghan d u q re'isi dolqun eysa ependining bildürishiche, bu qétimqi resim körgezmisi 2020-yili 22-séntebir b d t binasi aldida bashlinip, bir hepte dawam qilghan “Irqiy qirghinchiliq” qa qarshi resim körgezmisi pa'aliyitining dawami iken. U bu qétimqi resim körgezmisi pa'aliyitining meqsidi heqqide toxtalghanda, asasiy meqsedning xitayning b d t diki her türlük saxta teshwiqatlirigha reddiye bérishtin ibaret ikenlikini tekitlidi.

Jenwediki resim körgezmisige qatnishiwatqan d u q ning re'is wekili, “Sherqiy türkistan ölimalar birliki” ning mu'awin re'isi turghunjan alawudun ependining bildürishiche, bu pa'aliyetke ishtirak qilghuchilarning birqismi londunda 4 kün dawam qilghan “Uyghur sot kollégiyesi” ning 2-qétimliq guwahliq anglash yighinini tügitipla udul jenwege yétip kelgen bolsa, yene birqismi d u q ning myunxéndiki merkizidin körgezme resimlirini élip jenwege yétip kelgen.

14-Sétebir küni amérikaning jenwediki bash elchixanisida ötküzülgen échilish murasi bilen bashlan'ghan bu resim körgezmisi pa'aliyiti 19-séntebir künigiche dawam qilidiken.