Amérikadiki inzhénér kewser wahitning singlisi kamile wahitning tutup turulup tekshürülüwatqanliqi delillendi

Muxbirimiz shöhret hoshur
2023.02.01
Share on WhatsApp
Share on WhatsApp
kewser-wayit-guwahliq-2.jpg Kewser wahit singlisi kamile tutup kétilgendin kéyin, ijtima'iy taratqularda sinliq guwahliq berdi, 20223-yili 21-yanwar.
Kewserning Twitter hesabidin elindi

Amérikada xizmet qiliwatqan inzhénér kewser wahit yéqinda xénen ölkiside oquwatqan singlisi kamile wahitning yurtigha qaytqandin kéyin tutqun qilin'ghanliqini tiwittérda xewer qilghanidi. Muxbirimizning atushtiki alaqidar xadimlargha qarita élip barghan téléfon ziyaretliri dawamida, da'irilerning xitay ölkiliridin tetil qilip kelgen Uyghur oqughuchilargha qarita alahide nazaret tüzümini yolgha qoyghanliqi we atush shehiridiki pamir saqchixanisi tewelikidinla kamile wahit we tursunjan isimlik ikki oqughuchining tutup tekshürülüwatqanliqi delillendi.

Uyghur élida 2017-yili chong tutqun bashlinishning aldi-keynide chet'elge chiqip kelgenler alahide tekshürüsh we tutqun obyékti bolghanidi. Melum bolushiche ötken yildin bashlap xitay ichkiri ölkiliride oquwatqan Uyghur oqughuchilar, bolupmu tetil qilip kelgenler nuqtiliq tekshürüsh obyékti bolghan we azraqla guman qozghighanlar tutup tekshürülgen. Amérikada yashawatqan inzhénér kewser wahitning tiwittérda inkas qilishiche, uning xénen ölkisining shyangchyu sana'et institutida oquwatqan 19 yashliq singlisi kamile wahit 12-ayning béshida qishliq tetil qilip yurtigha qaytqinida tutqun qilin'ghan.

19 Yashliq studént qiz kamile wahit, 12-ay qishliq tetilde Uyghur rayonigha qaytqanda tutup kétilgen.
19 Yashliq studént qiz kamile wahit, 12-ay qishliq tetilde Uyghur rayonigha qaytqanda tutup kétilgen.
Kewser Wahit teminligen

Biz atushqa qarita élip barghan téléfon ziyaretlirimiz dawamida, kamile wahitning ata-anisi olturushluq teweliktiki pamir saqchixanisigha téléfon qilip kamile wahitning ehwali heqqide melumat soriduq.

Téléfonimizni qobul qilghan mezkur saqchixana siyasiy yétekchisining bayan qilishiche, bu saqchixanining bashqurush tewelikide xitay ölkiliride oquwatqan we tetil qilip kelgen 30 etrapida oqughuchi bar bolup bulardin ikki nepiri tutqun qilin'ghan.

Nöwette tutup tekshürülüwatqan bu ikki oqughuchidin birsining ismi tursunjan nesirdin, yene birsining kamile wahit ikenlikini ashkarilighan bu xadim, nöwette atushta xitay ichkiri ölkiliridin tetil qilip kelgen oqughuchilar we ularning a'ile-tawabi'atigha qarita nazaretni küchlendürgenlikini eskertti. Uning déyishiche, tetil qilip kelgen oqughuchilar derhal özlirini kent derijilik saqchixanilargha tizimlitish, qanunsiz gep-sözlerdin saqlinishqa buyrulghan.

Atush kattaylaq yézisidiki bir amanliq mudirimu öz tewelikide ichkiri ölkilerdin qaytip kelgen oqughuchilar we ularning a'ile-tawabi'atlirigha qarita nazaret we tekshürüshni kücheytilgenlikini tilgha aldi. Uning yene déyishiche, mekteplerde qishliq tetil bashlan'ghandin buyan, kent kadirliri öymu-öy tekshürüsh élip bérip ularning ichkiri ölkilerde oquwatqan perzentliri we yurttin srtqa chiqqan a'ile ezaliri heqqide qaytidin tizimlash élip barghan. Bu jeryanda mezkur a'ililerning atushning sirtigha chiqip ketken ezalirining gep-söz we ish heriketlirige mes'ul bolidighanliqi bildürülgen.

Pamir saqchixanisi bashliqining bildürüshiche, ichkiridin kelgen oqughuchilar we ularning ata-anisigha qarita telim terbiyede muqimliq we dölet bixeterliki asasliq téma bolghan. Teshwiqat we nazaret xaraktéridiki bu heriketning bashlan'ghinigha ikki ayche bolghan bolup, bu atush shehiri boyiche omumyüzlük élip bérilghan. Mezkur saqchixana bashliqi a'ililerge ichkiride oquwatqan oqughuchilarning mesile tughdurmasliqi üchün wede alghan.

Ötken yilqi éniqlashlirimizda xitay ichkiri ölkiliride xizmet qiliwatqan abduqadir rozi we tursunjan bilge qatarliq oqutquchilarning we yene ichkiride oquwatqan zulyar yasin qatarliq bir türküm oqughuchilarning tutqun qilin'ghanliqi ashkarilan'ghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.