Германийәдә «28-июл йәркән қирғинчилиқи» ни хатириләш намайиши өткүзүлди

Ихтиярий мухбиримиз әкрәм
2018-07-30
Елхәт
Пикир
Share
Принт
Германийәдә өткүзүлгән «28- июл йәркән қирғинчилиқи» ни хатириләш намайишидин бир көрүнүш. 2018-Йили 28-июл. Мюнхен, германийә.
Германийәдә өткүзүлгән «28- июл йәркән қирғинчилиқи» ни хатириләш намайишидин бир көрүнүш. 2018-Йили 28-июл. Мюнхен, германийә.
RFA/Ekrem

Баш штаби германийәниң мюнхен шәһиридә болған дуня уйғур қурултийиниң тәшәббуси, «явропа шәрқий түркистан бирлики» вә «германийә уйғур анилар бирлики» ниң ортақ тәшкиллиши билән 28-июл күни германийәниң мюнхен шәһиридики саяһәт мәркизи болған шитатхус мәйданида «28-июл йәркән қирғинчилиқи» ниң 4 йиллиқини хатириләш намайиши өткүзүлди.

Биз нәқ мәйданға берип, намайиш елип бериватқан бир қисим уйғур җамаәт вәкиллирини зиярәт қилдуқ. Д у қ ниң муавин рәиси пәрһат муһәммиди әпәнди намайиш мәйданида сөз қилип, буниңдин 4 йил илгири йәркәндә йүз бәргән қанлиқ вәқә һәққидә тохтилип өтти.

Намайишқа әрләрдин сирт, көплигән аяллар вә балиларму қатнашқан иди. Ай-юлтузлуқ көк байрақ вә «шәрқий түркистанда 1 милйондин артуқ уйғур җаза лагерлирида азабланмақта» дегәндәк һәр түрлүк хәтләр йезилған чоң лозункилар кишиләрниң диққитини җәлп қилди. Мюнхендики уйғур җамаәт әрбаблиридин аблимит турсун әпәндиму зияритимизни қобул қилип, бүгүнки бу намайишниң мәқсити һәққидә пикир баян қилди.

Намайишқа қатнашқан аяллардин уйғур зиялийси сүрәййә ханим йәркән қирғинчилиқини хатириләш билән биргә герман хәлқигә уйғур дияридики җаза лагерлири мәсилисини тонутуш үчүн тиришчанлиқ көрситиватқанлиқини әскәртти. Д у қ ниң муавин рәиси пәрһат муһәммиди әпәнди җаза лагерлири мәсилисиниң германийәдә барғансери қизиқ темиға айлиниватқанлиқини тилға алди.

Намайиш мәйданиға хитай түрмилиригә бәнд қилинған қанчә онлиған уйғур сиясий тутқунлириниң рәсимлири тизилған болуп, айиғи үзүлмәй өтүшүватқан саяһәтчиләр намайишчилардин бу намайишниң немә үчүн елип берилғанлиқи вә тизимликтики уйғур тутқунлар һәққидә мәлумат сорап турди. Пәрһат муһәммиди әпәнди сөзиниң ахирида уйғур диярида йүз бәргән тарихий вәқә-һадисиләрни давамлиқ хатириләшниң әһмийити һәққидә қарашлирини тилға елип өтти.

Мюнхендики бу намайиш икки йерим саәт давам қилди. Көплигән тәшвиқат вәрәқилири тарқитилди, хитайниң уйғур диярида қурған җаза лагерлири вә униңға қамалған тутқунлар тоғрисида саяһәтчиләргә чүшәнчә бериш үчүн тиришчанлиқлар көрситилди.

Пикирләр (0)
Share
Толуқ бәт