3 Yashliq abdullaning tayland doxturxanisida ötküzgen eng axiriqi 45 küni

Muxbirimiz qutlan
2014-12-30
Share
abdulla-3-yash-tayland-wapat-bolghan.jpg Üch yashliq abdullaning taylandiki melum doxturxanida dawaliniwatqan chaghda tartilghan süriti (2014-yil dékabir, tayland)
Photo: RFA


3 Yashliq abdullaning tubérkulyuz késelliki bilen taylandtiki melum bir doxturxanida qaza qilishi muhajirettiki Uyghur jama'etchilikide küchlük inkas peyda qildi.

Bu xewer eng deslep "Bangkok waqit géziti" de élan qilin'ghandin kéyin, taylandtiki ehwaldin xewerdar kishiler radiyomiz ziyaritini qobul qilip, özliri körgen we bilgen ehwallar heqqide uchur berdi.

Aldinqi hepte türkiyediki bir kino cholpini bilen bille taylandqa bérip u yerdiki tutup turush orunlirigha qamalghan musapirlar heqqide höjjetlik filim ishligen "Erk téléwiziyesi" ning riyasetchisi abdurahman öztürk bügün mexsus ziyaritimizni qobul qildi.

U ziyaritimiz jeryanida taylandtiki birqanchilighan tutup turush orunlirini ziyaret qilghanliqi, u yerge qamalghan we hazirghiche salahiyiti éniq bolmighan musapirlarning 10 aydin buyanqi éghir qismetliri heqqide melumat berdi.

U yéqinda qaza qilghan 3 yashliq sebiy bala abdulla we uning échinishliq ölümi heqqide munularni bayan qildi:

"Men taylandqa béripla 3 yashliq bir balining doxturxanida qaza qilghanliqini anglidim. Buning bilen sürüshtürüp yürüp axiri doxturxanining méyit saqlash öyidiki tonglatqugha sélip qoyghan bu balining méyitini taptim. Abdulla dégen isim bilen melum bolghan bu bala buningdin 10 aylar ilgiri taylandqa yoshurunche ötken musapirlar bilen bille kelgen iken. Epsuski, tayland saqchiliri musapirlarni malayshiya chégrasigha yéqin bir taghdiki ormanliqta qorshiwalghan waqitta, bu balining dadisi toptin ayrilip qalghan. Kéyin u melum yollar arqiliq türkiyege qéchip bériwalghan. Abdulla musapirlar bilen bille tutup turush ornigha qamalghandin kéyin uzun ötmeyla tubérkulyuz késilige giriptar bolghan. Uning qizitmisi örlep peqet öre turush imkaniyiti bolmighan ehwalda tayland saqchiliri teripidin doxturxanigha élip bérilghan. Kéyinche, bu balining anisiningmu iz - dériki bolmighan."

U yene töwendiki ehwallarni bayan qildi: "Saqchilar kéyinche bu balining uruq - tughqanlirining bar yoqluqini sorighanda birsi "Men tughqini bolimen" dep özini melum qilghan. Saqchilar u kishige doxturxanida turup abdullaning ehwalidin xewer élishqa élip chiqqan. Epsuski, 4 - 5 kündin kéyin bu kishimu doxturxanidin qéchip chiqip, iz - déreksiz ghayip bolghan. Abdullaning ehwali doxturxanida barghanséri éghirlashqan. Ata - anisi we bashqa héchqandaq tughqini bolmighan ehwalda u késel kariwitida top - toghra 45 kün yalghuz yétip axirida jan bergen. Uning hayatining axiriqi künliride doxturxanidiki bir musulman ayal doxtur uning halidin xewer alghan, shu sheherdiki musulmanlar jem'iyitidin bezi kishiler tamaq ekilip nimjan halette yatqan abdullani baqqan. Emdila 3 yashqa kirgen bu bala yat elde héchqandaq uruq - tughqini yénida bolmighan ehwalda tenha halda bu rehimsiz dunya bilen xoshlashqan."

"Men doxturxanining miyit saqlash öyige kirip bu balining tonglatqudiki miyitini kördüm. Balining yüz - közliri we ingeklirining astigha qan oyüp qizirip kétiptu. Éghizining bir burjikide sus qan izi turidu. Méni bu yerge bashlap kirgen héliqi musulman ayal doxtur abdullaning hayat waqtidiki resimlirini manga körsetti. U abdulla hayat waqtida qol téléfoni arqiliq késel kariwitida aylarche yalghuz yatqan bu balining resimini tartiwalghan iken. Men uning hayat waqtidiki resimi bilen qaza qilghandin kéyinki miyitini körüp azabtin chidiyalmay qaldim. Bu menzirini körgen herqandaq adem köz yéshi qilmay turalmaydu. U shunchilik chirayliq, shunchilik sebiy we shunchilik omaq bir bala iken, epsuski, rehimsiz teghdirning soghuq shamalliri téxi bu dunyaning héch bir xowliqini körmigen bu sebiy janni yat elde xazan qiptu…"

Abdurahman öztürk axirida yene, bu balining yéqindin buyan taylandtiki lagérlarda we tutup turush orunlirida qamalghan musapirlar ichide hayatidin ayrilghan 3 - kishi ikenlikini eskertip ötti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet