D u q wekilliri töt terep birleshme muhakime yighinigha qatnashti

Ixtiyariy muxbirimiz ekrem
2015.06.04
Share on WhatsApp
Share on WhatsApp
umid-agahi-perhat-muhemmidi.jpg Stutgart shehiride ötküzülgen xitay, Uyghur, tibet mongghul 4 terep birleshme yighinigha qatnashqan d u q wekilliridin ümid agahi(ongda) we perhat muhemmidi ependiler. 2015-Yili 3-iyun, gérmaniye.
RFA/Ekrem

Yawropada 4-iyunni xatirilesh namida ötküzülgen xitay, Uyghur, tibet, mongghuldin ibaret 4 terep birleshme yighini 3-iyun küni gérmaniyening stutgart shehiride bashlan'ghan bolup, amérika we yawropa elliridin toplan'ghan démokratik xitaylarning türlük partiye-guruhlirining bashliqliri hem tibetlikler, mongghullarning wekilliri qatnashqan bu yighin'gha d u q wekillirimu ishtirak qilghan.

Yighin 3-iyun küni kechte stutgart shehiridiki Holiday INN méhmanxanisida ötküzülgen.

Yighinni teshkilleshke mes'ul bolghan “Pütün dunya xitay we asiyaning démokratiye munbirini qollash” teshkilatining diréktori féy lyangyongning bügün firansiye awazigha bildürüshiche, bu yighin'gha chet'ellerde pa'aliyet élip bériwatqan xitay teshkilatliridin démokratik xitay fronti, xitay jumhuriyetchiler partiyisi, xitay démokratlar partiyisi, xitay yéshillar partiyisi, ichki mongghul xelq partiyisi, tibet teshkilatliri hem dalay lamaning yawropadiki wekilliri bilen birge d u q wekillirimu qatnashqan.

Yighin'gha yene yawropaning herqaysi elliridiki xitay teshkilatlirining wekilliri, teywenlikler, fransuzlar we gérmaniyening siyasiy, diniy sahesidiki bir qisim kishiliri bolup 10 din artuq dölettin kelgen 50 tin artuq kishi teklip qilin'ghan.

3-Iyun küni Holiday INN méhmanxanisida ötküzülgen yighinning asasiy témisi “Tyen'enmén weqesining 26 yilliqini xatirilesh muhakime yighini” bolsimu, yighinda xitayning démokratiyige köchüsh mesilisi nuqtiliq muzakire qilin'ghan. Her qaysi ellerdin kelgen wekiller yighinda öz qarashlirini bildürüp ötüshken.

Bu qétimqi yighin'gha d u q wekili bolup qatnishiwatqan qurultayning mu'awin re'isi ümid agahi ependi we qurultay neshriyat-teshwiqat merkizining mudiri perhat muhemmidi ependiler bügün ziyaritimizni qobul qilghanda, bu qétimqi yighinning zor ehmiyetke ige bir yighin bolghanliqini alahide tekitlep, yighinning tepsilati toghruluq bizge etrapliq melumatlar berdi. Tepsilatini töwendiki söhbettin anglighaysizler.

Yighin küntertibidin melum bolushiche, 4-iyun küni chüshtin kéyin stutgart shehiride yene “4-Iyun tyen'enmén weqesi”ge a'it resim körgezmisi we nutuq sözlesh pa'aliyiti ötküzülidiken. 4-Iyun kechte bolsa, lehman kulubida teziye murasimi ötküzülüp, 4-iyun qirghinchiliqining melumatlirini gérmaniye diniy sahesining teshwiqati arqiliq xelq ichige keng yéyish meqsiti ishqa ashurulidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.