Gollandiye we bélgiyede “5-Féwral ghulja weqesi” ni xatirilesh namayishi élip bérildi

Myunxéndiki xitay konsulxanisi aldida ötküzülgen “5-Féwral ghulja weqesi” ning 21 yilliqini xatirilesh namayishidin körünüsh. 2018-Yili 5-féwral, gérmaniye.

“5-Féwral ghulja weqesi” ni xatirilesh munasiwiti bilen gollandiye we bélgiyedimu 3-féwral we 5-féwral künliri namayish élip bérildi.

3-Féwral küni bélgiyediki Uyghurlar biryussél sheher merkizige toplinip, 1997‏-yilidiki “5-Féwral ghulja weqesi” ning 21 yilliqini xatirilesh munasiwiti bilen namayish élip barghan. Kök bayraq we kök kiyimlik namayishchilar her xil sho'arlar bilen 2 sa'et namayish qilghan.

5-Féwral küni gollandiyediki Uyghurlarmu dénhag shehiridiki parlamént binasi aldigha jem bolup, özgiche usulda namayish élip barghan. D u q medeniyet komitéti mudiri zeynidin ependi parlamént binasi aldida 8 ming tal etirgül bilen gülchembirek tizip, Uyghurlarning “5-Féwral ghulja weqesi” ni xatirilesh we weqede hayatidin ayrilghanlarni eslesh héslirini ipade qilghan.

D u q re'isi dolqun eysa ependimu alayiten gérmaniyedin bérip, gollandiyede ötküzülgen bu qétimqi namayishni qollighan.

Zeynidin ependi bu qétimqi namayishqa shotlandiyelik bir muzikant kishinimu teklip qilghan bolup, uning aghzi arqiliq Uyghur jama'itige weten söygüsi heqqide ders anglatqan. U sözide, bu pa'aliyetke köpligen Uyghur jama'itining qatnashqanliqidin köp söyün'genlikini tilgha aldi.

Gollandiyediki Uyghur ziyaliysi abdusalam ependimu bu qétimqi namayish heqqide toxtilip, namayishning tesirlik, janliq rewishte dawam qilghanliqini éytti.

Melum bolghinidek, d u q ning chaqiriqi bilen, bu yilqi “5-Féwral ghulja weqesi” ni xatirilesh namayishi yaki ilmiy yighilishliri muhajirettiki Uyghurlar topliship olturaqlashqan döletlerning hemmisidila élip bérildi. Közetküchilerning qarishiche, bu, Uyghur jama'itining xitay hökümiti Uyghur diyarida yürgüzüwatqan qattiq basturush siyasitige qarita janliq bir inkasi bolup hésablinidiken.