“5 феврал ғулҗа вәқәси” дә зиянкәшликкә учриған бир аилиниң һекайиси

Ихтиярий мухбиримиз абдувәли аюп
2018.02.09
2017-ghulja-kochiliri-01.jpeg Ғулҗа кочилиридин бир көрүнүш. 2017-Йили.
RFA/Abduweli Ayup

1997-Йили бәшинчи феврал күнидики ғулҗа яшлириниң наразилиқ намайиши бастурулғандин кейин йүргүзүлгән омумйүзлүк тутқунда ғулҗа наһийисиниң кепәкйүзи йезисидики бир аилидин бәш оғул зиянкәшликкә учриған. Һәқни сөзләш, тоғра йолда меңиш вә җамаәт ишлиридики мәсулийәтчанлиқи билән тонулған летип аилисидин абдувәли летип муддәтсиз қамақ җазасиға һөкүм қилинған. Униң инилиридин абдуғени летип қатарлиқ төтәйлән сәккиз йиллиқтин тартип үч йиллиққичә муддәтлик қамақ җазасиға һөкүм қилинған.

Мәзкур аилә билән он йиллиқ достлуқ мунасивитидә болған, һазир түркийәдә яшаватқан һәсәнҗан абдуваһит әпәнди летип аилисиниң бешиға кәлгән паҗиәләр һәққидә мәлумат аңлатти.

Униң ейтишичә, абдувәли летип 1997-йили язда “дөләтни парчилашқа урунуш вә қутратқулуқ қилиш” җинайити билән әйибләнгән вә муддәтсиз қамақ җазасиға һөкүм қилинған болуп, һазир үрүмчидики түрмә районида қамақлиқ икән.

Канадада яшайдиған һаҗи әпәнди абдувәли летипни тонуйдиғанлиқни, униң муддәтсиз қамақ җазасиға һөкүм қилинғанлиқидин хәвәрдар икәнликини ейтти.

Түркийәдә яшайдиған, әмма исмини ашкарилашни халимайдиған бир уйғур абдувәли летип һәққидә өзиниң билидиғанлирини аңлатти.

Униң ейтишичә, абдувәли летип ғулҗа яшлириниң намайишини тәшкиллигән абдухелил абдумиҗитниң йенидики кишиләрдин икән.

Ғулҗа наһийә кепәкйүзидики летип аилисиниң бүгүнки әһвали һәққидә ғулҗидин мәлумат елишқа тиришқан болсақму, әмма һеч қандақ бир учурға еришәлмидуқ. Һалбуки, бу аилидикиләрни тонуйдиған, нөвәттә түркийәдә яшаватқан бир уйғур абдувәли летип аилисидикиләрниң һазир қайтидин қамаққа елинғанлиқ иһтималини илгири сүрди. 

Хитай һөкүмитиниң бир аилидин чиққан аталмиш сиясий мәһбус сәвәблик пүтүн аилидикиләрни җазалаш қилмиши хәлқара җәмийәт вә кишилик һоқуқ тәшкилатлириниң тәнқидигә учрап кәлмәктә. Ғулҗида йүз бәргән 1997-йилидики “бәшинчи феврал вәқәси” сәвәблик зиянкәшликкә учриған аилә әзалирини ениқлаш давамида ғулҗа наһийә тохучи йеза вә чапчал наһийәсидиму мушундақ аилә бойичә җазаланғанларниң барлиқи ениқланди. Кейинки программиларда бу һәқтә давамлиқ мәлумат беримиз.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.