“5 Féwral ghulja weqesi” de ziyankeshlikke uchrighan bir a'ilining hékayisi

Ghulja kochiliridin bir körünüsh. 2017-Yili.

Ghulja kochiliridin bir körünüsh. 2017-Yili.

Ghulja kochiliridin bir körünüsh. 2017-Yili.

1997-Yili beshinchi féwral künidiki ghulja yashlirining naraziliq namayishi basturulghandin kéyin yürgüzülgen omumyüzlük tutqunda ghulja nahiyisining képekyüzi yézisidiki bir a'ilidin besh oghul ziyankeshlikke uchrighan. Heqni sözlesh, toghra yolda méngish we jama'et ishliridiki mes'uliyetchanliqi bilen tonulghan létip a'ilisidin abduweli létip muddetsiz qamaq jazasigha höküm qilin'ghan. Uning iniliridin abdughéni létip qatarliq töteylen sekkiz yilliqtin tartip üch yilliqqiche muddetlik qamaq jazasigha höküm qilin'ghan.

Mezkur a'ile bilen on yilliq dostluq munasiwitide bolghan, hazir türkiyede yashawatqan hesenjan abduwahit ependi létip a'ilisining béshigha kelgen paji'eler heqqide melumat anglatti.

Uning éytishiche, abduweli létip 1997-yili yazda “Döletni parchilashqa urunush we qutratquluq qilish” jinayiti bilen eyiblen'gen we muddetsiz qamaq jazasigha höküm qilin'ghan bolup, hazir ürümchidiki türme rayonida qamaqliq iken.

Kanadada yashaydighan haji ependi abduweli létipni tonuydighanliqni, uning muddetsiz qamaq jazasigha höküm qilin'ghanliqidin xewerdar ikenlikini éytti.

Türkiyede yashaydighan, emma ismini ashkarilashni xalimaydighan bir Uyghur abduweli létip heqqide özining bilidighanlirini anglatti.

Uning éytishiche, abduweli létip ghulja yashlirining namayishini teshkilligen abduxélil abdumijitning yénidiki kishilerdin iken.

Ghulja nahiye képekyüzidiki létip a'ilisining bügünki ehwali heqqide ghuljidin melumat élishqa tirishqan bolsaqmu, emma héch qandaq bir uchurgha érishelmiduq. Halbuki, bu a'ilidikilerni tonuydighan, nöwette türkiyede yashawatqan bir Uyghur abduweli létip a'ilisidikilerning hazir qaytidin qamaqqa élin'ghanliq ihtimalini ilgiri sürdi. 

Xitay hökümitining bir a'ilidin chiqqan atalmish siyasiy mehbus seweblik pütün a'ilidikilerni jazalash qilmishi xelq'ara jem'iyet we kishilik hoquq teshkilatlirining tenqidige uchrap kelmekte. Ghuljida yüz bergen 1997-yilidiki “Beshinchi féwral weqesi” seweblik ziyankeshlikke uchrighan a'ile ezalirini éniqlash dawamida ghulja nahiye toxuchi yéza we chapchal nahiyesidimu mushundaq a'ile boyiche jazalan'ghanlarning barliqi éniqlandi. Kéyinki programmilarda bu heqte dawamliq melumat bérimiz.