Токйодики хитай әлчиханиси алдида 5-июлни хатириләш намайиши болди

Ихтиярий мухбиримиз һаҗи қутлуқ қадири
2016-07-04
Share
yaponiye-5-iyul-namayish.jpg Токйодики хитай әлчиханиси алдида өткүзүлгән 5-июл үрүмчи вәқәсини хатириләш намайишидин көрүнүш. 2016-Йили 5-июл, японийә.
RFA/Qutluq

3-Июл японийә уйғур бирлики тәшкилатиниң тәшкиллиши билән токйодики хитай әлчиханиси алдида 5-июл вәқәсини хатириләш йүзисидин намайиш елип берилди.

Қәдирлик радийо аңлиғучилар, һазир аңлаватқиниңлар токйодики хитай әлчиханиси алдида 2009-йили үрүмчидә йүз бәргән 5-июл вәқәсини хатириләш йүзисидин японийә уйғур бирлики тәшкилати елип бериватқан намайиш болуп, намайиш тәшкиллигүчиләрдин доктор турмуһәммәт һашим телефон зияритимизни қобул қилип намайиш һәққидә қисқичә тохталди.

Намайишқа иштирак қиливатқан японийәлик уйғур кишилик һоқуқ мәсилилирини қоллиғучи такаши сато намайиш һәққидә тохтилип: “бүгүн гәрчә намайишқа қатнашқан әзалиримизниң сани чәклик болсиму, бирақ һәммимиз бирдәк җушқун роһимиз билән хитай әлчиханиси алдида үрүмчи қирғинчилиқида өлүп кәткәнләрни әсләш, түрмиләргә наһәқ қамалғанларни қоюп беришкә хитай һөкүмитини дәвәт қилиштин ибарәт хитай компартийисигә болған наразилиқимизни ипадиләп намайиш елип бериватимиз” деди.

Намайишқа қатнишиватқан датә ханим йәттә йил илгири үрүмчидә йүз бәргән 5-июл вәқәсини әсләш мәқситидә токйодики хитай әлчиханиси алдида елип бериливатқан намайиштин өзиниң толиму тәсирләнгәнликини ипадиләп: “йәттә йил илгири өзиниң һәқ‏-һоқуқлирини қоғдаш йолида намайишта өлүп кәткәнләрни қайғу ичидә әсләш билән биргә, уларға болған һөрмитимизни билдүрүп қирғинчилиқниң җавабкари хитай компартийисигә болған нәпритимизни билдүрүватимиз” деди.

Японийә уйғур бирлики тәшкилатиниң рәиси доктор турмуһәммәт һашимниң билдүрүшичә, намайиш җәрянида йәнә 5-июл вәқәси мунасивити билән төт түрлүк тәләп оттуриға қоюлған бир баянатнамиму елан қилинған.

Японийәдә елип бериливатқан тәйвән мустәқиллиқ һәрикитини қоллиғучилардин бири болған такиди әпәнди бүгүнки 5-июл вәқәсини мунасивити билән елип берилған намайишқа өзиниң қатнишиш сәвәби үстидә тохтилип мундақ деди: “хитай билән охшаш бир милләттин болған тәйвәнликләрму хитай компартийисиниң инсан һәқлирини дәпсәндә қилишидин ибарәт бу хил сияситини толуқ чүшинип йәткәнлики үчүн узундин бири өз алдиға мустәқил дөләт болушни тәләп қилип келиватиду. 5-Июл вәқәси болса хитайдин тил, дин вә мәдәнийәт җәһәттин пәрқлиқ болған уйғурларниң өз земинлириға өзи игә болушини тәләп қилип елип барған әркинлик намайишидур. Мән шу сәвәбтин уйғурларни қоллаш мәқситидә намайишқа қатнаштим.”

Японийәдики уйғур сиясий актиплиридин гүлистан әзизи намайиштин кейин өз тәсиратини баян қилип 5-июл вәқәсини хатириләшниң муһимлиқини билдүрди.

Игилишимизчә, токйодики хитай әлчиханиси алдида елип берилған намайиш чүштин кейин саәт төттин саәт бәшкә қәдәр бир саәт давам қилған.

Юқириқи аваз улинишидин тәпсилатини аңлаң.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт