Истанбулдики уйғурлар хитай консулханиси алдида намайиш қилди

Ихтиярий мухбиримиз арслан
2016-07-04
Share

Үрүмчи вәқәси йүз бәргәнликиниң 7-йили мунасивити билән 3-июл йәкшәнбә күни чүштин кейин “һөр шәрқий түркистан мунбири” ниң уюштуруши вә түркийәдики аммиви тәшкилатлардин “туранчи һәрикәт мунбири” ниң қоллап-қуввәтлиши билән истанбулдики хитай консулханиси алдида намайиш вә баянат елан қилиш паалийити өткүзүлди.

Намайишқа шәрқий түркистан маарип вә һәмкарлиқ җәмийити, шәрқий түркистан вәхпи, шәрқий түркистан яшлар вә һәмкарлиқ җәмийити қатарлиқ аммиви тәшкилатларниң әзалири вә истанбулда яшаватқан уйғурлардин әр-аял вә өсмүрләр болуп көп санда киши қатнашти.

Намайишчилар истанбулниң зәйтинбурну вә сәфакөй районидики бәлгиләнгән орунлардин қоллирида ай юлтузлуқ көк байрақларни көтүргән һалда аптобус вә кичик аптомобиллар билән йолға чиқип, хитай консулханисиниң алдиға йетип кәлди. Туранчи һәрикәт мунбири әзалириниң һәр бири, түрк дунясини символ қилған шәрқий түркистан, қазақистан, қирғизистан, түркмәнистан, әзәрбәйҗан вә түркийә байрақлирини егиз көтүргән һалда хитай консулханиси алдиға йетип кәлди.
Қоллирида шәрқий түркистанниң ай юлтузлуқ көк байриқи вә түркийә байриқи көтүрүвалған, әр-аял вә балилардин тәшкил тапқан намайишчилар хитайниң йүргүзүватқан бастуруш, сиясити вә чәклимилиригә қарши шоар товлап консулханиға йеқинлап кәлди.Намайишчилар бирдәк дегәндәк шоарлар товлиди.

Хитай консулханисиниң алдида бихәтәрлик сақчилири консулхана дәрвазиси алдини төмүр ришаткилар билән тосувалған болуп, намайишчилар тосуқтин өтәлмәй бу йәрдә тохтимай шоар товлиди вә тәкбир кәлтүрүп әтрапни зилзилигә салди.
Намайишчилар қоллирида 2009-йили 5-июлда йүз бәргән үрүмчи қәтлиамидин көрүнүшләр вә шоарлар йезилған вивиска тохтиларни көтүрүвалған болуп, тахтиларға, “хитай шәрқий түркистанда җинайәт садир қиливатиду. Һөррийәт, һөррийәт, шәрқий түркистанға һөррийәт... ” дегәндәк чоң һәҗимлик хәтләр йезилған.

Намайиш җәрянида бир түркүм яшлар хитай консулханисиға киришкә урунуп сақчилар билән иттиришип кәтти. Кейин җәмийәт мәсуллириниң чақириқ қилиши билән яшлар қаршилиқ қилиштин тохтиди.

Кейин һөр шәрқий түркистан мунбиригә вакалитән, шәрқий түркистан маарип вә һәмкарлиқ җәмийитиниң рәиси һидайәтуллаһ оғузхан үрүмчи қирғинчилиқиға алақидар тәйярлиған баянатни оқуп өтти.

Һидайәтуллаһ оғузхан баянатта буниңдин йәттә йил бурун үрүмчи шәһиридә йүз бәргән вәһший қирғинчилиқни хатириләп өтти вә шундин буян уйғурлар үстидин зулум вә бастурушларниң һелиһәм давамлишиватқанлиқини тәкитлиди. Ишғалчи хитай таҗавузчилириға бу зулум вә қирғинчилиқларни тохтитиш һәққидә чақириқ қилди.

Намайиш җәрянида йәнә җамаәт әрбаби абдулқадир япчан вә ибраһим дамоллам қатарлиқ кишиләрму сөз қилип хитайниң зулум вә бастуруш сиясәтлирини тәнқид қилди вә хитайни зулумни тохтитишқа чақириқ қилди.

Ибраһим дамоллам сөзидә алди билән бу намайишниң үрүмчидә вәтән хәлқиниң һәқ-һоқуқлирини қоғдаш йолида мәйданға чиқип шеһит болған ака-ука вә һәдә-сиңилларниң роһини шадландуруш вә уларниң ирадилирини ишқа ашуруш вә шундақла өзлириниң ислами вә миллий бурчини ада қилиш мәқситидә намайишқа топланғанлиқини билдүрди.

Йиғинда йәнә истанбулда яшаватқан сиясий паалийәтчи абдуләзиз әпәнди сөз қилип, хитайни уйғурларға зулум қилмаслиққа чақириқ қилди вә зулум билән һакимийәт башқурушниң шу һакимийәтни һалакәткә йүзләндүридиғанлиқи билән агаһландурди.

Намайиш җәрянида яшлар хитайни әйибләп тохтимай шоар товлиди.

Намайишта йәнә америкидин истанбулға кәлгән уйғур сиясий паалийәтчи әнвәр йүсүп турани микрофонни елип “шәрқий түркистан истиқлал марши” ни җараңлиқ оқуп өтти.

Иптар вақти болғанда намайишчиларға түркистан полуси билән опчә иптар зияпити берилди.

Биз бу намайиш тоғрисида пикир қарашлирини елиш үчүн намайишта үрүмчи вәқәсигә алақидар баянатни елан қилған шәрқий түркистан маарип вә һәмкарлиқ җәмийитиниң рәиси һидайәтуллаһ оғузхан билән сөһбәт елип бардуқ.
Һидайәтуллаһ оғузхан бу намайишни оюштуруштики мәқсити вә намайишниң әһмийити тоғрисида тохталди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт