‏Shwétsiyediki Uyghurlar namayish qilip, naraziliq bayanati élan qildi

Ixtiyariy muxbirimiz éhsan
2014.07.07
shiwetsiye-5-iyul-namayish.JPG ‏Shwétsiyediki Uyghurlar namayish qilip, naraziliq bayanati élan qildi. 2014-Yili 5-iyul.
RFA/Ehsan

7-Ayning 5-küni shwétsiyening paytexti stokholim shehiride sherqiy 5-iyul ürümchi weqesining 5 yilliqi munasiwiti bilen namayish élip bérildi.

Bu qétimqi namayishni shwétsiye Uyghur ma'arip uyushmisi uyushturghan bolup, namayishqa shiwétsiyede turushluq türk jem'iyetliridin teqwa jem'iyiti, ezerbeyjan fidratsiyuni, türkmenistan fédratsiyuni, türkiyening tashqi ellerdiki uruq-tughqanlar birlikining mes'uli, qirim tatarlirining shwétsiye wekili, shwétsiyediki yéshillar partiyisidin parlamént namzati, xelq'ara insan heqlirining wekilliri hemde bashqa ammiwi teshkilat mes'ulliri we stokholim etrapidiki sheherlerde yashawatqan Uyghurlardin bolup 200din artuq kishi qatnashti.

Namayishta aldi bilen namayishni orunlashturghuchi Uyghur ma'arip uyushmisining re'isi nijat turghun Uyghur ma'arip uyushmisi namidin naraziliq bayanatini oqudi.

Teklip bilen sözge chiqqan shwétsiye yéshillar partiyisi parlamént namzati derya özel xanim, sözide xitay da'irilirining sherqiy türkistanda mekteplerde oqutquchi we oqughuchilarning roza tutushini chekligenlikige qattiq naraziliqini bildürüp xitayni tenqid qildi.

Namayish shwétsiye waqti sa'et 14:00 da shwétsiye parlamént binasi aldida bashlinip bir sa'et etrapida dawamlashqandin kéyin, shwétsiye parlamént aldidin xitay elchixanisighiche bolghan 4 kilométir yolni piyade mangdi.

Namayishchilar xitay elchixanisi aldigha barghandin kéyin, dunya Uyghur qurultiyining shwitsiyede turushluq bayanatchisi dilshat rishit, köpchilikni bügünki qanliq yekshenbe künni untup qalmasliqqa chaqirdi.

Namayish intayin yuqiri keypiyat ichide élip bérildi, namayish qatnashquchilar sho'ar towlap özining xitaygha bolghan naraziliqini ipadilidi hemde xitayning dölet bayriqini köydürüp tashlidi.

Namayish jeryanida ziyaritimizni qobul qilghan bir yash yigit bilen bir xanim namayish tesiratini otturigha qoydi.

Namayish axirida ziyaritimizni qobul qilghan Uyghur ma'arip uyushmisining bash katipi abdulla ehet bügünki namayishning élip bérilishi we ehmiyiti heqqide toxtaldi.

Namayish teklimakan islam medeniyet merkizining mes'uli ömer mexsumning qilghan du'asi bilen namayish axirlashti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.