Almatada ürümchi paji'esi qurbanlirini xatirilesh pa'aliyiti ötküzüldi

Ixtiyariy muxbirimiz oyghan
2016-07-04

Siyasetshunas qehriman ghojamberdi ependi almata shehirining zarya wostoka mehellisidiki bir öyge jem bolghan Uyghurlargha 2009-yili 5-iyul ürümchi paji'esi we Uyghurlarning weziyiti heqqide söz qilmaqta. 2016-Yili 3-iyul, qazaqistan.

RFA/Oyghan

3-Iyulda almata shehirining zarya wostoka mehellisidiki bir öyge jem bolghan Uyghurlar 2009-yil 5-iyul ürümchi weqesini xatirilesh pa'aliyiti ötküzdi.

Aldi bilen özlirining insaniy heq-hoquqlirini qoghdash yolida qurban bolghanlarning rohigha atap qur'an tilawet qilin'ghandin kéyin, siyasetshunas qehriman ghojamberdi ürümchi paji'esi we uningdin kéyinki yilliri Uyghur élida yüz bergen weqeler, u yerdiki siyasiy, ijtima'iy we diniy weziyet, Uyghurlarning milliy lidéri rabiye qadir bashliq dunya Uyghur qurultiyining shu yönilishte élip barghan pa'aliyiti heqqide tepsiliy toxtaldi. U shundaqla yéqin arida firansiye paytexti parizhda ötidighan dunya Uyghurlirining nöwettiki qurultiyining teyyarliq ishliri heqqide melumat berdi.

Xatirilesh pa'aliyitide sözge chiqqan tursun arziyéf, aztékin ibrahimof, dilinur qasimowa, hakimjan aznibaqiyéf we bashqilar ürümchi aliy mektep oqughuchiliri we yashlirining tinch namayishining Uyghur milliy herikitige körsetken tesiri, bolupmu ottura asiyaning qazaqistan we qirghizistan jumhuriyetliridiki Uyghur jama'etchilikining xitay da'irilirining basturush heriketlirige qarshi naraziliqi, dunya jama'etchiliki we xelq'ara teshkilatlarning Uyghur élidiki weziyetke bolghan munasiwiti, shundaqla birlik, ittipaqliq qedriyetliri heqqide öz oy-pikirlirini otturigha qoydi. Sözligüchiler mezkur pa'aliyetke almata shehiri we almata wilayitining nahiye we yéziliridin belgilen'gen wekillerning qatnashqanliqini tekitlidi.

Radiyomiz ziyaritini qobul qilghan diniy zat muhemmetjan hajim we dostluq mehellisining turghuni aztékin ibrahimof murasim heqqide öz qarashlirini bildürdi.