Bishkekte 5-iyul qanliq waqesi xatirilendi

Ixtiyariy muxbirimiz firuze
2017-07-05
Élxet
Pikir
Share
Print
2009-Yili 5-iyulda ürümchi shehiride yüz bergen qanliq qirghinchiliq weqesining 8 yilliqini xatirilesh yighinida shéhitlarning rohigha du'a qilmaqta. 2017-Yili 5-iyul, bishkek.
2009-Yili 5-iyulda ürümchi shehiride yüz bergen qanliq qirghinchiliq weqesining 8 yilliqini xatirilesh yighinida shéhitlarning rohigha du'a qilmaqta. 2017-Yili 5-iyul, bishkek.
RFA/Firuze

5-Iyul küni bishkek shehiride qirghizistan Uyghurliri "Ittipaq" jem'iyitining uyushturushi bilen 2009-yili 5-iyulda ürümchi shehiride yüz bergen qanliq qirghinchiliq weqesining 8 yilliqini xatirilesh yighini bolup ötti.

Yighin'gha bishkek shehiri we uning etrapidiki nahiye we yézilardin qara balta we toxmaq sheherliridin kelgen Uyghur jama'etchiliki qatnashti. Yighin'gha "Ittipaq" jem'iyitining re'isi artiq hajiyéf riyasetchilik qildi. U deslep jama'etke salam yollap, pütün Uyghurlar yashawatqan döletlerde bügünki matem kün xatiriliniwatqanliqini we xitay hökümitige naraziliq bildürüsh pa'aliyetliri ötküzülüwatqanliqini bildürüp, aqsaqallar kéngishidin mirzakim abdulofni weten azadliqi we musteqilliqi yolida qurban bolghan shéhitlargha atap xetme qur'an oqushqa teklip qildi.

"Ittipaq" jem'iyitining mu'awin re'isi dilshat xasanof doklat berdi. Öz doklatida u, xitay da'iriliri uzun yillardin béri, Uyghurlarning insaniy heq ‏-hoquqlirini depsende qilip kéliwatqanliqini, 2009-yili 5-iyul ürümchide studént we yashlarning tinchliq namayishini xitay hökümitining qoralliq esker-qisimlarni ishqa sélip qirghin qilghanliqini, netijide bir nechche yüz kishining qurban bolghanliqini, nechche minglighan yashlarning türmilerge solan'ghanliqini, 5-iyul weqesige qatnashqan nechche yüzligen yashlarning ölüm jazasigha, muddetsiz türme jazasigha höküm qilin'ghanliqini hemde xitayning, xelq'araliq insan heqlirini himaye qilish teshkilatlirining, bu xil qirghinchiliq siyasitini toxtitish toghrisidiki qararlirigha boysunmay, ta bügünki kün'giche dawamlashturuwatqanliqini tenqidlep ötti.

Qoshumche doklat bilen insan hoquqlirini qoghdash teshkilatning re'isi tursun islam niyazi sözge chiqip, bir wetenperwer Uyghur saqchining ewetken melumatlirini tonushturup ötti.

Yighin qatnashquchisi, "Ittipaq" jem'iyiti ayallar kéngishining re'isi reshidem emetxanowa öz héssiyatlirini sözlep ötti.

Yighinning axirida, artiq hajiyéf 5-iyul paji'esining 8 yilliqini xatirilesh murasimigha qatnashqan barliq wetendashlargha "Ittipaq" jem'iyiti namidin öz minnetdarliqini bildürdi.

Shundaqla bu yil birinchi qétim, 5-iyul qanliq weqesi qirghizistanning jenubi wilayitide "Ittipaq" jem'iyitining jalal'abad shehiridiki shöbisi teripidin we elishér nasiraxunofning qollap-quwwetlishi bilen uyushturulup, qirghizistan xelq assambléyesining idariside xatirilendi. Xatirilesh pa'aliyitige jalal'abad shehiri we etrapliridiki yéziliridin kelgen Uyghur jama'iti we bashqa milletler wekilliri qatnashti.

Toluq bet