Yawropada 5000 kishilik namayishning teyyarliqi dawamlashmaqta

Ixtiyariy muxbirimiz ekrem
2018-04-11
Share
5-ming-kishilik-namayish.jpg Brussélda ötküzülidighan 5 ming kishilik namayishning logosi.
RFA/Ekrem

4-Ayning 27-küni yawropa parlaménti aldida ötküzülidighan chong namayishning teyyarliq xizmetliri jiddiy dawam qilmaqtiken.

Dunya Uyghur qurultiyi teripidin uyushturuluwatqan, 4-ayning 27-küni bélgiye paytexti biryussélda ötküzülidighan 5000 kishilik namayishning teyyarliq xizmetlirige gérmaniye, firansiye, norwégiye, shiwétsiye, gollandiye, bélgiye qatarliq yawropadiki 10 gha yéqin dölettiki Uyghur teshkilatliri awaz qoshup birlikte heriket qilmaqtiken. Hazir yuqiriqi teshkilatlarning ijtima'iy taratqulardiki teshwiqatliri jiddiy dawamlashmaqta iken.

"Yawropa sherqiy türkistan birliki" ning re'isi turghunjan alawudun ependi gérmaniyediki teyyarliq xizmetliri toghrisida uchur bergende, 500 etrapida Uyghurning myunxén shehiridin namayishqa baridighanliqini tilgha aldi.

5000 Kishilik namayishning teshwiqatini ijtima'iy taratqularda her küni dégüdek türlük sin we ün filimliri bilen élip bérip shöhret qazan'ghan norwégiyediki Uyghur ziyaliysi zeynure xanim, özining keng da'iride qollashqa érishkenlikini tekitlidi.

Gollandiyediki "5000 Kishilik namayish teyyarliq komitéti" ning ezasi zeynidin ependimu gollandiyediki teshwiqatning hemde teyyarliq xizmetlirining ünümlük élip bériliwatqanliqini eskertti.

Shiwétsiyediki "Sherqiy türkistan ma'arip uyushmisi" ning rehberliridin abdulla kökyar ependi, shiwétsiyediki namayish teshwiqati hemde teyyarliq xizmetlirini qanat yaydurush xizmitining hélihem dawam qiliwatqanliqini tekitlesh bilen birge yawropadiki barliq Uyghur jama'itini bu pa'aliyetke aktip ishtirak qilishqa dewet qildi.

Melum bolghinidek, bélgiye paytexti biryussélda ötküzülidighan 5 ming kishilik namayish üchün dunya Uyghur qurultiyi yene "10 Ming kishilik namsiz mehbuslar" tizimlikini toplawatqan bolup, bu xizmetkimu herqaysi ellerdiki Uyghur teshkilatliri yéqindin hemkarlashmaqta iken.

D u q ning mu'awin re'isi perhat muhemmidi ependi bu heqte toxtalghanda, 5000 kishilik namayishning muhajirettiki Uyghurlarning milliy rohini urghutushta alahide ehmiyetke ige ikenlikini bayan qildi.

D u q ijra'iye komitétining mu'awin re'isi semet abla ependimu bu heqte öz tesiratini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet