5000 Kishilik namayishning teyyarliqliri tamamlandi

27-Aprél yawropa ittipaqi aldida ötküzülidighan 5000 kishilik namayishqa bir hepte waqit qalghan. D u q bu namayishning ghelibilik ötküzülüshi üchün “5000 Kishilik namayish teyyarliq komitéti” hemde “5000 Kishilik namayish teshwiqat guruppisi” ni qurup chiqqan bolup, qanche onlighan Uyghur siyasiy aktipliri we Uyghur teshkilatliri bu namayish üchün birqanche aydin buyan teyyarliq xizmetliri bilen shughullan'ghan. Bu guruppidikiler yene “10 Ming kishilik namsiz mehbuslarning tizimlikini toplash” pa'aliyitinimu birlikte élip barghan.

5000 Kishilik namayishning tertipini saqlash xizmitige mes'ul bolghan d u q ning mu'awin re'isi perhat muhemmidi ependining bildürüshiche, bu qétimqi namayishning teshwiqati yéterlik derijide keng da'irilik élip bérilghan. Axirqi muhim xizmet namayish tertipini qoghdash, namayishchilarning bixeterlikige kapaletlik qilish, namayish sho'arida birlikni saqlash, kütülmigen hadisilerge taqabil turush, buzghunchiliqlarning aldini élish, buning üchün 60 kishilik mexsus tertip saqlash etriti berpa qilish qatarliq nazuk sahelerdiki teyyarliq mesilisi bolup, bu jehettiki xizmetlermu netijilik tamamlan'ghan. 

“5000 Kishilik namayish teyyarliq komitéti” ning ezasi, “Norwégiye Uyghur komitéti” ning re'isi bextiyar ependi, 5000 kishilik namayishning norwégiyediki teyyarliq xizmetlirining ongushluq axirlashqanliqini eskertti. Gollandiyediki teyyarliq xizmetlirimu asasen pütken. Yüzligen Uyghurlar ayropilan yaki mashina bilen bu qétimqi namayishqa ülgürüp kélishke hazirlan'ghan. D u q ning gollandiyediki wekili zeynidin tursun ependi bu heqte melumat bergende gollandiyediki yüzligen yashlarning bu heriketke qatnishish üchün xéli burunla teyyarliqlirini tamamlap bolghanliqini tekitlidi. 

5000 Kishilik namayishqa eng köp kishining qatnishishi texmin qiliniwatqan dölet bélgiye bolup, bélgiye Uyghur jem'iyitining re'isi abdullamning qurultay rehberlirige bergen melumatlirigha qarighanda, bélgiyening biryussél we antwérpén sheherliridiki Uyghurlar yalghuz shu yerdiki Uyghur, türk jama'itini namayish üchün qozghashqa ehmiyet béripla qalmay, herqaysi döletlerdin kélidighan Uyghurlarni kütüwélish, orunlashturush ishlirining teyyarliqinimu estayidil ishligen. 

D u q teminligen uchurlargha asaslan'ghanda, 27-aprél yawropa ittipaqi aldida ötküzülidighan 5000 kishilik namayishqa gérmaniye, en'gliye, firansiye, italiye, norwégiye, finlandiye, gollandiye, shiwétsiye, shwétsariye, türkiye, yaponiye, awstriye, awstraliye, qazaqistan, qirghizistan, kanada, amérika qatarliq 20 ge yéqin dölettin minglighan Uyghurlar kélip qatnishidighan bolup, ay-yultuzluq kök bayraq we uning séymasi chüshürülgen yaghliq-sharpilar, xitay hakimiyitige qarshi sho'arlar yézilghan yüzligen lozunka we teshwiqat taxtayliri, xitay türmisidiki tutqunlarning süretliri chüshürülgen teshwiqat lewheliri, “Yépiq terbiyilesh merkizi” namliq jaza lagérigha solan'ghanlarning süretliri qatarliqlar bilen bu qétimqi namayish özgiche heywetlik bir tüs alidiken.

Igilishimizche, namayishtin birqanche kün burun, bélgiyening antwérpén shehiride d u q ning 6-nöwetlik wekiller qurultiyining “Tunji nöwetlik ijra'iye komitéti kéngeytilgen yighini” hemde “3-Nöwetlik sherqiy türkistan istratégiye muhakime yighini” ötküzülidighan bolup, bu yighinlarghimu 16 dölettin 40 etrapida Uyghur siyasiy aktipliri, ziyaliylar, teshkilatlar mes'ulliri, diniy zatlar wekilliri we d u q rehberliri kélip qatnishidiken. Bu pa'aliyetlerning teyyarliq xizmetlirimu tamamlan'ghan.