5000 Kishilik namayishqa qatnishidighan Uyghurlarning köpi bélgiyege yétip kelgen

Ixtiyariy muxbirimiz erkin tarim
2018.04.26
Share on WhatsApp
Share on WhatsApp
5-ming-kishilik-namayish.jpg Brussélda ötküzülidighan 5 ming kishilik namayishning logosi.
RFA/Ekrem

27-Aprél bélgiye paytexti biryusséldiki yawropa parlaméntining aldida ötküzülidighan 5000 kishilik namayishqa qatnishidighan Uyghurlarning köpi kélip bolghan bolup, pütün teyyarliq xizmetliri tamamlan'ghan.

Namayishqa dunya Uyghur qurultiyining aliy rehbiri rabiye qadir xanim, d u q ning re'isi dolqun eysa qatarliqlardin sirt, amérika qoshma shtatliri, kanada, awstraliye, türkiye, yaponiye, qazaqistan, qirghizistan we yawropa döletliridin kelgen 7 yashtin 70 yashqiche bolghan Uyghurlar qatnishidiken. Undin bashqa bir qisim qérindash milletler wekillirimu ishtirak qilidiken. D u q bu namayishning ghelibilik ötküzülüshi üchün mexsus “Namayish teyyarliq komitéti” qurup, birqanche aydin buyan teyyarliq xizmetliri bilen shughullan'ghan. Namayishning harpa küni biryussélda méhmanlarni kütüwatqan d u q ijra'iye komitétining re'isi ömer qanat ependi, qurultayning mu'awin re'isi perhat muhemmidi ependi we bélgiye Uyghur jem'iyitining re'isi abdullam ependiler bilen téléfon söhbiti élip barduq.

Perhat muhemmidi ependi pütün teyyarliq xizmetlirining pütkenlikini, kötüridighan lozunkilar we towlaydighan sho'arlarghiche hemmisini békitip bolghanliqini bayan qildi.

Ömer qanat ependi 26-aprél küni amérika, yaponiye awstraliye we türkiye qatarliq döletlerdin 6 yüz etrapida kishining bélgiyege kélip bolghanliqini, 27-aprél küni etigen namayish bashlighuche 5 ming kishining kélip bolidighanliqini bayan qildi.

D u q rehberlirining bayanatlirigha asaslan'ghanda, bu namayishni ötküzüshtiki meqset Uyghurlarning nöwettiki éghir weziyitini yawropa ittipaqi arqiliq dunyagha anglitish iken. Ömer qanat ependi, dunyaning siyaset merkezliridin biri hésablinidighan yawropa birlikining aldida ötküzülidighan namayish arqiliq d u q ning közligen nishanigha yétish üchün tirishchanliq körsitidighanliqini bildürdi.

Bu qétimliq chong namayishning bélgiyening siyasiy sahedikilerge shundaqla yawropa ittipaqigha körsitidighan tesiri qandaq bolidu, uning yawropa döletlirige Uyghur mesilisini tonushturushtiki ehmiyiti zadi néme? d u q qa masliship namayishchilargha sahibxaniliq qiliwatqan bélgiye Uyghur jem'iyitining re'isi abdullam teyyarliq xizmetlirining pütüp qalghanliqini, bélgiyede bundaq keng kölemde namayish ötküzüshning ehmiyitining zor ikenlikini bayan qildi.

Bu qétimqi namayish muhajirettiki Uyghurlar tarixida élip bérilidighan eng chong kölemdiki namayish bolup, namayishqa ayropilan bilen 22 sa'et uchup kelgenlermu köp iken. Awstraliyedin kelgen Uyghur pa'aliyetchi bextiyar böre ependi özining Uyghurlarning peryadini yawropa ittipaqi arqiliq dunyagha anglitish meqsitide kelgenlikini, bu arzusining choqum emelge ashidighanliqini bayan qildi.

Namayish bashlashtin 5 kün burun, bélgiyening antiwérfén shehiride d u q ning 6-nöwetlik wekiller qurultiyining “Tunji nöwetlik ijra'iye komitéti kéngeytilgen yighini”, arqidin “3-Nöwetlik sherqiy türkistan istratégiye muhakime yighini” ötküzülgen bolup, bu yighinlarghimu 16 dölettin 30 etrapida Uyghur siyasiy aktipliri, ziyaliylar, teshkilatlar mes'ulliri, diniy zatlar wekilliri we d u q rehberliri kélip qatnashqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.