Сахавәтчи нуртай һаҗимниң 6 айдин бери қамақта икәнлики дәлилләнди

Мухбиримиз шөһрәт һошур
2018-10-26
Елхәт
Пикир
Share
Принт
Нуртай һаҗим мәктипидики оқуғучилар билән биргә. Ғулҗа.
Нуртай һаҗим мәктипидики оқуғучилар билән биргә. Ғулҗа.
Oqurmen teminligen

Бирқанчә айдин бери иҗтимаий таратқуларда ғулҗидики мәшһур хәйр-сахавәтчи нуртай һаҗимниң тутқун қилинғанлиқи һәққидә учур тарқалған иди. Мухбиримизниң ениқлашлири давамида нуртай һаҗимниң аз дегәндә 6 айдин бери қамақта икәнлики вә 4 айниң алдида бир қетим сотқа чиққанлиқи дәлилләнди.

Хитайниң «сина» торида сақланған бир мақалида тонуштурулушичә, 1950‏-йилларда туғулған нуртай һаҗим 1980‏-йилларниң оттурилири импорт қилинған машиниларни ремонт қилиш мулазимити билән шуғуллинип игилик тиклигән. 1990‏-Йилларда ‏ғулҗида чегра содиси башланғанда у хәлқара саяһәт вә йүк тошуш ширкити қуруп, содида саһәсидә қәд көтүргән. У 1995 ‏-йили 3 милйон 800 миң йүән мәбләғ селип, бир йетим-йесирлар мәктипи ачқан. «Нуртай искәндәр йетимләр мәктипи» дәп аталған бу мәктәптә уйғур дияриниң хотән, қәшқәр қатарлиқ һәрқайси җайлиридин 150 чә оқуғучи оқуш вә яшаш имканиға еришкән. Йәнә шу мақалида дейилишичә, нуртай һаҗим һәр йили оқуғучиларниң турмуш вә оқуш хираҗити үчүн бир милйон 150 миң йүән хираҗәт аҗратқан икән.

Уйғур җәмийитидики балилар вә маариптин ибарәт диққәткә сазавәр бу вәзипини тәшәббускарлиқ билән үстигә алған сахавәтчи нуртай һаҗим бу йил 4‏-айда қазақистандики бир тиҗарәт сәпиридин қайтқанда үн-тинсиз ғайиб болған. Вәзийәттин хәвәрдар бир кишиниң баян қилишичә, униң аилә әзалири вә уруқ-туғқанлири хели мәзгилгичә униң из-дерикини алалмиған. Буниңдин 4 айчә илгири униң сотланғанлиқи вә 18 йиллиқ кесилгәнлики һәққидә җәмийәттә гәп тарқалған. Вәзийәттин хәвәрдар киши нуртай һаҗимниң әһвалини билип беқиш үчүн униң уруқ-туғқанлириға телефон қилған болсиму, әмма һечқайсиси нуртай һаҗимниң тәқдири һәққидә еғиз ечишқа җүрәт қилалмиған. 

Буниңдин бирнәччә ай илгири америкида паалийәт елип бериватқан «диалог фонди» намидики бир кишилик һоқуқ тәшкилатиниң хитайчә тор бетидә ғулҗида бир түркүм содигәрләрниң сотланғанлиқи, сотланғанлар арисида сахавәтчи нуртай һаҗимниңму барлиқи тилға елинған. Биз бу учурларниң тоғра-хаталиқини ениқлаш үчүн ғулҗидики идарә-органлар вә сақчиханиларға телефон қилдуқ. Һәрәмбағ сақчиханисиниң хадими «нуртай искәндәр йетимләр мәктипи» ниң тақилип кәткәнликини ашкарилиди. Бу хадим нуртай һаҗимниң қанчә йил кесилгәнликини дәп бәрмигән болсиму, әмма униң дәрябойи йоли сақчиханиси тәрипидин тутулғанлиқини йошурмиди. Вәзийәттин хәвәрдар киши нуртай һаҗимниң тутулуш сәвәплиридин бири сүпитидә униң йетимләр мәктипигә бир қанчә сиясий мәһбусниң пәрзәнтини қобул қилип қалғанлиқи икәнликини баян қилған иди. Сақчи хадими бу һәқтә мәлумат елиш үчүн дәрябойи сақчиханисидин әһвал игилишимизни тәвсийә қилди. Дәрябойи сақчихана хадимиму нуртай һаҗим делоси һәққидә мәлумат бериштин өзини қачурди. Сақчиханиниң сиясий йетәкчиси нуртай һаҗимниң буниңдин 4 ай аввал сотланғанлиқини баян қилди. Әмма уму униң үстидин чиқирилған һөкүм һәққидә мәлумат берәлмиди. 
Һөрмәтлик радио аңлиғучилар, вәзийәттин хәвәрдар киши нуртай һаҗимниң сот мәйданиға койза-кишәнләр билән елип чиқилғанлиқи вә 18 йиллиқ кесилгәнликини илгири сүргән иди. Әмма областлиқ сақчи идарисиниң хадими нуртай һаҗи үстидин 4 ай аввал ечилған сотниң нәтиҗиси һәққидә мәлумат беришни кәскин шәкилдә рәт қилди.
Әң йеқинда ғулҗидин игиләнгән бир ғәйрий рәсмий учурда нуртай һаҗимниң техичә қамақта икәнлики, делосиниң давамлиқ тәкшүрүлүватқанлиқи, сотниң техи ахирқи һөкүмни чиқармиғанлиқи илгири сүрүлгән.

Пикирләр (0)
Share
Толуқ бәт