Қирғизистанда «5 июл үрүмчи вәқәси» ниң 9 йиллиқи хатириләнди

Ихтиярий мухбиримиз ферузә
2018-07-06
Елхәт
Пикир
Share
Принт
Қирғизистанда өткүзүлгән «5-июл үрүмчи вәқәси» ни хатириләш паалийитидин бир көрүнүш. 2018-Йили 5-июл. Бишкәк, қирғизистан.
Қирғизистанда өткүзүлгән «5-июл үрүмчи вәқәси» ни хатириләш паалийитидин бир көрүнүш. 2018-Йили 5-июл. Бишкәк, қирғизистан.
RFA/Feruze

5-Июл күни қирғизистан пайтәхти бишкәк шәһиридики уйғур җамаити «аламедин-1» мәһәллисидә җәм болуп «иттипақ» җәмийитиниң уюштуруши билән «5-июл үрүмчи вәқәси» ниң 9 йиллиқини хатириләш паалийити өткүзди.

Мурасимға бишкәк шәһири вә униң әтрапидики наһийә вә йезилардин кәлгән уйғур җамаәтчилики қатнашти. Мурасим қирғизистан уйғурлири «иттипақ» җәмийитиниң рәиси артиқ һаҗиефниң риясәтчиликидә елип берилди. Алди билән дини зат абдурешит надируф вәтәнниң азадлиқи вә мустәқиллиқи йолида қурбан болған шеһитларға атап хәтмә-қуран оқуди. 

Сиясий пәнләрниң магистир намзати абдурәһим һапизоф асасий доклатни оқуп, хитай даирилири узун йиллардин бери уйғурларниң инсаний һәқ ‏-һоқуқлирини дәпсәндә қилип келиватқанлиқини ейтип, «5-июл вәқәси» гә қатнашқан нәччә йүзлигән яшларниң өлүм җазасиға, муддәтсиз түрмә җазасиға һөкүм қилинғанлиқини, хитайниң хәлқаралиқ инсан һәқлирини һимайә қилиш тәшкилатлириниң бу хил қирғинчилиқ сияситини тохтитиш тоғрисидики қарарлириға бойсунмай та бүгүнки күнгичә давамлаштуруватқанлиқини тәнқидләп өтти.

Арқидин қирғизистандики пешқәдәм уйғур паалийәтчиләрдин турсун ислам ниязи сөз қилди. 

Мурасимға қатнашқан дуня уйғур қурултийиниң қирғизистандики вакаләтчиси розимуһәммәт абдулбақийеф һәр бир йиғин-мурасимлар шәрқий түркистан миллий марши билән башлиниши керәкликини тәкитләп, җамаәткә шәрқий түркистан миллий маршини аңлатти. Розимуһәммәт әпәнди йәнә бүгүнки күнләрдә хитай даирилириниң бесим сиясити күчийип келиватқан болсиму, лекин дуня уйғур қурултийиниң һәрикәтлири хәлқаралиқ сәһнисидә көтүрүлүп бериватқанлиқини илгири сүрди. 

Йиғин қатнашқучиси, «иттипақ» гезитиниң сабиқ муһәррири шәмсиддин абдуреһим әпәнди сөз қилип, америка, германийә вә түркийә һөкүмәтлиригә уйғур җамаәтчилики намидин тәшәккүр хәт йезишни илтимас қилди.

Радио зияритимизни қобул қилған ақсақаллар кеңишиниң әзаси абдурешит надироф дуня уйғур қурултийиниң чақириқлириға паал аваз қошидиғанлиқини изһар қилди.

Игилишимизчә, «5-июл қанлиқ вәқәси» бу йил биринчи қетим «иттипақ» җәмийитиниң җалалабад шәһиридики шөбиси тәрипидин әлишир насирахунофниң тәшәббуси билән ош вилайитиниң қәшқәр-қишлақ йезисида хатириләнди. Хатириләш паалийитигә қирғизистанниң җәнубидики үч вилайәтниң уйғур аһалиси қатнашти. Қәшқәр-қишлақтики мурасимға ош вилайитидики «иттипақ» шөбисиниң рәиси һәмидулла мәтисһақоф риясәтчилик қилди. Асасий доклатни җалалабад вилайити ақсақаллар кеңишиниң әзаси әлишер насирахуноф оқуп өтти. У «5-июл қанлиқ қирғинчилиқи һеч қачан унтулмайду» деди.

Пикирләр (0)
Share
Толуқ бәт