Shinjang pédagogika uniwérsitéti sha'ir abduqadir jalalidinning tutqun qilin'ghanliqini delillidi

Muxbirimiz shöhret hoshur
2018-04-23
Élxet
Pikir
Share
Print
Shinjang pédagogika uniwérsitétining proféssori, ataqliq sha'ir we edib abduqadir jalalidin.
Shinjang pédagogika uniwérsitétining proféssori, ataqliq sha'ir we edib abduqadir jalalidin.
Social Media

Shinjang pédagogika uniwérsitétining proféssori, ataqliq sha'ir we edib abduqadir jalalidinning ürümchi shehiridiki dölet amanliqi saqchiliri teripidin tutqun qilin'ghanliqi éniqlandi. Bu uchur mezkur uniwérsitétning amanliq bashqarmisi siyasiy ishlar bölümining mes'uli féng wénchyang teripidin delillendi. Féng wénchyang abduqadir jalalidinning 29‏-yanwar küni ürümchi sheherlik dölet amanliqi saqchiliri teripidin tutup kétilgenlikini bayan qildi.

Sha'ir abduqadir jalalidinning tutulghanliqi buningdin bir ayche ilgiri anglighuchilirimiz teripidin radiyomizgha yetküzülgen idi. Emma ürümchidiki alaqidar idare-organlar abduqadir jalalidin heqqide melumat bérishini izchil türde ret qilip kelgen idi. Ötken heptining axiri gérmaniyediki "Sherqi türkistan uchur merkizi" qatarliq ijtima'iy axbarat wastilirimu abduqadir jalalidinning tutulghanliqi heqqide xewer bergen idi.

Uyghur diyarigha qarita izchil dawamlashqan téléfon ziyaretlirimiz dawamida köpinche xadimlar ehwal heqqide melumat bérishtin özini qachurdi. Shinjang pédagogika uniwérsitéti qoghdash bashqarmisining bir xadimi abduqadir jalalidinning 3 aydin béri mektepte yoqluqini ashkarilidi. U yene abduqadir jalalidinning tutulup ketkenliki heqqide jem'iyette gep tarqalghanliqi, emma mektepning resmiy yosunda bu weqeni ishchi-xizmetchilirige téxi uqturmighanliqini bayan qildi. Mektep qoghdash bashqarmisi siyasiy ishlar bölümining mes'uli féng wénchyang, abduqadir jalalidinning tutqun qilin'ghanliqini delillidi. Téléfon ziyaritimiz dawamida xatirisidiki tutqunlar tizimlikige estayidil qarap chiqqan féng wénchyang, abduqadir jalalidinning ürümchi sheherlik dölet amanliq saqchi etriti teripidin bu yil 1‏-ayning 29‏-küni tutup kétilgenlikini bayan qildi. 

Hörmetlik radi'o anglighuchilar, bu uchur delillinishtin awwal, yeni ötken jüme küni dunya Uyghur qurultiyining aliy rehbiri rabiye qadir xanim abduqadir jalalidin heqqide mexsus bayanat élan qilip, muhajirettiki Uyghur teshkilatlirini abduqadir jalalidinning tutulghanliq xewirini xelq'ara jama'etke keng kölemde yetküzüshke dewet qilghan idi. Bügün dunya Uyghur qurultiyi bayanat élan qilip, xitay da'irilirining abduqadir jalalidinni tutqun qilghanliqini eyiblidi.

Toluq bet