Abduweli ayup délosining qeshqerge qayturulup qayta tekshürülüwatqanliqi melum bolmaqta

Muxbirimiz qutlan
2014-01-28
Share
abduweli-ayup-ailisi.jpg Abduweli ayupning a'ilisi. Amérika.
RFA

Igilishimizche, türmidiki yash tetqiqatchi, tonulghan tor yazghuchisi we musteqil ma'aripchi abduweli ayup délosining yéqinda ürümchi tengritagh rayonluq edliye orunliridin qeshqerge qayturulup yéngiwashtin tekshürülüwatqanliqi melum.

Ötken yili 20-awghustta ürümchidin ewetilgen mexpiy saqchilar teripidin qeshqerdiki öyidin tutup kétilgen abduweli ayup 5 aydin buyan iz-déreksiz ghayib bolghan. Uning ayali we uruq-tughqanliri qeshqer wilayetlik saqchi orunliridin tartip ürümchidiki türmilergiche qeder sürüshtürgen bolsimu, lékin abduwelining qeyerge qamalghanliqini bilelmigen.

"Uyghurbiz" tori yéngi yil harpisida abduweli ayupning 2014-yili 1-ayda sotlinidighanliqi heqqidiki xewerni élan qilghandin kéyin, bu uchur közetküchilerning diqqitini tartqan. Wehalenki, radi'omiz abduweli ayupning biwasite tughqanlirigha téléfon qilip ehwal igiligen bolsimu, lékin tughqanlirining héchqaysisi uning qachan sotlinidighanliqi heqqide éniq uqturush tapshuruwalmighanliqini bildürgen.

15-Yanwar radi'omiz abduweli ayupning xitay ölkiliridiki melum uniwérsitétta oquwatqan jiyeni mirshat bilen téléfon söhbiti élip bardi. Mirshat uruq-tughqanlirining ürümchige kélip hökümetning munasiwetlik orunliridin abduwelini dawamliq sürüshtürüwatqanliqini, lékin téxiche uning héchqandaq iz-dérikini alalmighanliqini bayan qildi.

Aridin ikki hepte ötkende, yeni bügün radi'omiz yene abduweli ayupning hazirqi ehwali heqqide uning tughqanliridin uchur igileshke tirishti. Téléfon ziyaritimizni qobul qilghan mirshat taghisi abduweli heqqide 5 aydin buyan tunji qétim yéngi uchur anglighanliqini bildürdi.

Uning bayan qilishiche, 19-yanwar küni abduwelining chong akisi ürümchige kélip ukisining ehwalini sürüshtürgen. On nechche kün ürümchidiki her derijilik saqchi we hökümet orunliridin sürüshtürüsh arqiliq, abduwelining ürümchidiki melum türmige qamalghanliqini, uning délosining yéqinda edliye orunliri teripidin qeshqerge qayturulup qayta tekshürülüwatqanliqi heqqide uchurgha érishken.

Mirshatning bildürüshiche, abduwelining chong akisi shunche tirishchanliq körsitipmu abduweli bilen körüshelmigen. Hökümet orunliri peqetla edliye tarmaqlirining abduweli ayup délosini sot qilishtin burun qayta tekshürüsh üchün qeshqerge chüshürgenliki heqqide qisqa uchur bergen.

Mirshat ziyaritimiz jeryanida abduweli ayupning chong akisi érishken uchurlargha asaslinip, abduwelining qeshqerde emes, belki ürümchide sotlinish éhtimalliqi barliqini ilgiri sürdi.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet