Abduweli ayup qatarliq ücheylenning yéqinda ürümchide sotlan'ghanliqi melum

“Ana til xelq'ara soda cheklik shirkiti” ning mudiriyet ezaliri: (soldin onggha)dilyar obul , ekberjan , abduweli ayup we muhemmetsidiq ependiler. 2013 Yili 28-iyun, ürümchi.

Igilishimizche, abduweli ayup, muhemmet sidiq we dilyar obul qatarliq ücheylenning buningdin ikki hepte ilgiri, yeni 11-iyul küni ürümchi tengritagh rayonluq sot mehkimiside sotlan'ghanliqi melum.

Ular “Qanunsiz meblegh toplash” qatarliq jinayetler bilen eyiblen'gen bolsimu, ulargha höküm élan qilinmighan.

Abduweli ayup qatarliq “Ana til xelq'ara cheklik shirkiti” ning asasliq 3 neper qurghuchisi ötken yili 20-awghustta xitay da'iriliri teripidin tutqun qilin'ghan idi. Shundin buyan hazirghiche bolghan az kem bir yil jeryanida ularning qeyerge qamalghanliqi, salametlik ehwali hemde mezkur déloning ishlinish jeryani heqqide da'iriler héchqandaq uchur bermidi. Birqanche ay burun ürümchi shehiri tengritagh rayonluq teptish mehkimisi mezkur déloni sot mehkimisige yollighanliqi heqqide uchur bergen bolsimu, lékin qachan we qeyerde sot échilidighanliqi melum emes idi.

Bügün abduweli ayupning tughqanliridin biri radi'omiz ziyaritini qobul qilip, buningdin ikki hepte ilgiri ulargha ürümchi tengritagh rayonluq sot mehkimiside ochuq sot échilghanliqini ilgiri sürdi.

Ochuq sot 7-ayning 11-küni (jüme küni) etigen sa'et 8:00 de bashlinip taki chüshtin kéyin'giche dawamlashqan. Abduweli ayup, muhemmet sidiq we dilyar obul ücheylen saqchilarning qarawulluqida sot meydanigha élip kérilgen.

Ularning ata-ana we uruq-tughqanliri sot meydanida tunji qétim ular bilen yüz körüshken, emma ularning yéqin ariliqtin körüshüshige yaki sözlishishke yol qoyulmighan. Abduweli ayup qatarliqlar peqetla bash lingshitip uruq-tughqanlirigha salam béreligen.

Sot jeryanida ularning özini aqlishigha yaki könglidiki sözlirini köpchilikke déyishige purset bérilmigen. Ular ücheylen'ge wakaliten peqet adwokatlar zakonlashqan.

Abduweli ayupning ziyaritimizni qobul qilghan tughqinining bildürüshiche, sot jeryanida abduweli ayup qatarliq ücheylen “Qanunsiz meblegh toplash” we “Omumning mülkini özining qiliwélish” dégendek iqtisadiy jinayetler bilen eyiblen'gen.

Adwokatning sottin kéyin abduweli ayupning a'ilisidikilerge bildürüshiche, egerde bu ücheylen peqetla iqtisadiy jinayet bilen eyiblense, u chaghda ulargha bérilidighan qamaq jazasi nisbeten yénikrek bolushi mumkin iken.

Halbuki, bu qétimliq sotta abduweli ayup qatarliq ücheylen'ge axirqi jaza hökümi élan qilinmighan, belki hökümning 15 kün ichide a'ilisidikilerge uqturulidighanliqi bildürülgen.

Sotqa qatnashqanlarning bayanlirigha qarighanda, abduweli ayupning salametliki we keypiyati burunqi halitidin köp özgermigen. Dilyar obulning burunqidin bir'az semrigendek körün'genlikini, buning ishshiq yaki bashqa sewebtin kélip chiqqan beden halitidiki özgirish ikenlikini sot meydanidikiler éniq jezm qilalmighan. Muhemmet sidiqning burunqi halitidin körünerlik oruqlap ketkenliki sézilgen.

Bu qétimliq sot ochuq-ashkara échilghan bolsimu, lékin hökümet taratqulirida bu heqte bu héchqandaq xewer bérilmigen. Sotqa abduweli ayupning anisi, ayali, aka-achiliri shundaqla ürümchige kéleligen uruq-tughqanlirining hemmisi dégüdek qatnashqan.

Hazir abduweli ayup, muhemmet sidiq we dilyar obul ücheylenning a'ile-tawabi'atliri sotning axirqi hökümini kütmekte iken.