Abduweli ayup qatarliq üch neper wijdan mehbusigha höküm élan qilin'ghan

Muxbirimiz qutlan
2014-08-26
Share
Abduweli-Ayup-Muhemmetsidiq.JPG Abduweli ayup bilen muhemmetsidiq “Ana til xelq'ara soda cheklik shirkiti” ning qurulush murasimida. 2013-Yil 1-awghust, ürümchi.
Oqurmendin


Abduweli ayup, muhemmetsidiq we dilyar obul qatarliq üch neper wijdan mehbusi tutqun qilinip top - toghra bir yil ötkende ulargha jaza hökümi élan qilin'ghanliqi melum bolmaqta.

Igilishimizche, abduweli ayup qatarliq “Ana til xelq'ara cheklik shirkiti” ning tutqundiki üch neper asasliq qurghuchisi bu yil 11 - iyulda ürümchi shehiri tengritagh rayonluq sot mehkimiside sotlan'ghan. Halbuki, ulargha bérilgen jaza hökümi sot meydanida élan qilinmighan. Eyni waqitta ücheylenning a'ile tawabi'atlirigha sot hökümini saqlash uqturulghan.

Bügün abduweli ayupning uruq - tughqanliridin igilishimizche, 21 - awghust küni, yeni abduweli ayup qatarliqlar tutqun qilin'ghinigha top - toghra bir yil tolghan küni ular sot mehkimisining axiriqi hökümnamisini tapshuruwalghan.

Hökümnamide, “Ana til xelq'ara cheklik shirkiti” ning diréktori muhemmetsidiqqa 2 yil 3 ayliq muddetlik qamaq jazasi we qoshumche 130 ming som jerimane, shirketning mudiriyet ezaliridin dilyar obulgha 2 yilliq muddetlik qamaq jazasi we 100 ming som jerimane, abduweli ayupqa 1 yil 6 ayliq muddetlik qamaq jazasi we 80 ming som jerimane qoyulghan.

Abduweli ayupning tughqanlirining bildürüshiche, sotning axiriqi hökümi élan qilin'ghandin kéyin, abduweli ayup bilen dilyar obul ikkeylen “Bashqa dewa - desturimiz yoq” dep hökümnamige imza qoyghanliqi melum. Wahalenki, muhemmetsidiqning mezkur hökümnamige süküt qilghanliqi yaki yoqiri sotqa erz sun'ghanliqi melum emesken.

Sot hökümide abduweli ayup qatarliq “Ana til xelq'ara cheklik shirkiti” ning üch neper mes'ul xadimining ayrim - ayrim halda “Jama'et amanet pullirini qanunsiz qobul qilghanliq jinayiti ötküzgenliki üchün muddetlik qamaq jazasi” bérilgenliki we jerimane qoyulghanliqi eskertilgen.

Hökümnamide yene yoqiriqi ücheylenning jaza mudditining 2013 - yili 20 - awghustta tutqun qilin'ghan kündin bashlap hésablinidighanliqi tekitlen'gen.

Abduweli ayupning tughqanlirining bildürüshiche, nawada mezkur sot hökümide qeyt qilin'ghan mezmunlar resmiy küchke ige qilinsa, abduweli ayupning yene 6 aydin kéyin türmidin qoyup bérilishi mumkin iken.

Melum bolushiche, abduweli ayup qatarliq ücheylen téxiche ürümchi lyudawandiki 4 - türmide qamaqliq bolup, jaza hökümining qachandin bashlap ijra qilinidighanliqi éniq emesken. Ularning uruq - tughqanliri téxiche ular bilen yüzturane körishelmigen, peqet adwokatning wastisi bilen ehwalliship turghan.

Hazirghiche, xitay hökümet taratqulirida bolsun yaki ammimiy uchur wastiliride bolsun, ularning sotlinish jeryani we sot hökümi toghriliq héchqandaq xewer bérilmigen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet