Abduweli ayup qatarliq wijdan mehbuslirining ürümchide échilghan sirliq soti we uning ich yüzi

Muxbirimiz qutlan
2014-09-16
Share
abduweli-ayup-hokumname.jpg Abduweli ayup qatarliq wijdan mehbusliri ustidin ürümchi shehiri tengritagh rayonluq sot mehkimisi chiqarghan hökümname. 2014-Yil 11-awghust
Photo: RFA

Igilishimizche, ürümchi shehiri tengritagh rayonluq sot mehkimisining abduweli ayup qatarliq wijdan mehbusliri üstidin chiqarghan sot hökümining téxiche ijra basquchigha kirmigenliki melum.

Abduweli ayupning tughqanliridin biri bügün radi'omiz ziyaritini qobul qilip, uzaqqa sozulghan bu délo we sirliq sot heqqide körgen we anglighanlirini bayan qildi.

Michüen türmisige yötkelgen 3 neper mehbus

Melum bolushiche, bu yil 11-iyulda abduweli ayup, muhemmetsidiq we dilyar obul qatarliq 3 neper wijdan mehbusi ürümchi shehiri tengritagh rayonluq sot mehkimiside sotlan'ghan.

Wehalenki, sot meydanida ulargha bérilgen höküm élan qilinmighan. Aridin 1 ay 10 kün ötkende, yeni ular ücheylen tutqun qilin'ghinigha top-toghra bir yil tolghan 21-awghust küni ularning a'ilisidikiler andin hökümnamini tapshurup alghan.

Abduweli ayupning tughqanlirining radi'omizgha bildürüshiche, sottin kéyin da'iriler ular ücheylenni lyudawan türmisidin michüen türmisige yötkigen.

Melum bolushiche, abduweli ayup sot hökümige naraziliq erz sunushtin waz kechken. Chünki naraziliq erzi qarap chiqilip yuqiri sotning qarari kelgüche, ularning yene az dégende 6 ayghiche türmide saqlishi mumkinken.

Sot hökümi 21-awghust ularning a'ilisidikilerge uqturulghandin kéyin muhemmetsidiqning naraziliq erzi sun'ghanliqi melum.

Abduweli ayupning tughqanlirining bildürüshiche, yéqinda dilyar obulmu sot hökümige qarita naraziliq erzi sun'ghan. Bundaq ehwalda bu ücheylenning jaza hökümi téxiche ijra basquchigha kirmigen. Ular michüen türmisige köchürülüp hazirghiche a'ilisidikiler we uruq-tughqanliri bilen körüshtürülmigen.

Jawabkarlar bilen aqlighuchi adwokatqa söz pursiti bérilmigen ghelite sot

11-Iyul küni ürümchide ötküzülgen neq meydan sotigha qatnashqan abduweli ayupning tughqini munularni bildürdi:

"Sot shu küni chüshtin burun échildi. Sotqa bizning a'ilidin animiz, abduwelining ayali, ikki akisi, achiliri we bashqa yéqin tughqanlar qatnashti. Abduweli ayup, muhemmetsidiq we dilyar obul ücheylen sot meydanigha élip kirilgende ular bilen közlirimiz uchrashti. Biz ünsiz rewishte bash lingshitip salamlashtuq. Biz sot meydanidiki anglighuchilar olturidighan jayda, ular ücheylen 'jawabkarlar' ornida olturdi."

"Ulargha özini aqlash yaki délogha munasiwetlik weqelerning jeryanini déyish pursiti bérilmidi. Peqetla sotchining we eyibligüchilerning so'allirigha 'he-e!' yaki 'yaq!' dep bir éghiz söz bilen jawab béridighan qisqa purset bérildi. Hetta aqlighuchi adwokatqimu sotning pütkül jeryanida gep qilidighan purset bérilmidi. Gepning hemmisini sotchi, mu'awin sotchi we eyibligüchiler qildi hemde qolliridiki teyyar yéziwalghan nersilerni oqudi. Sot ene shundaq axirlashti!"

Abduweli bilen hazirghiche körüshelmiduq!

Abduweli ayupning tughqini ziyaritimiz jeryanida yene munularni bildürdi: "Sot échilip, hökümname élan qilinip aridin 2 ay ötken bolsimu, a'ilimizdikiler abduweli bilen téxiche körüshelmidi. Men bu qétim qizimni oqushqa mangdurush üchün ürümchi arqiliq ichkirige barghan idim. Yolda ürümchide toxtap abduweli bilen körushüshning imkaniyitini izdidim, epsus manga hazirche körüshkili bolmaydighanliqini uqturdi. Shundaq qilip, héchqaysimiz uning bilen körüshelmiduq."

"Sot échilishtin ilgiri adwokat türmige bérip ular bilen körüshetti we ehwalni bizge yetküzüp turatti. Hazir adwokatmu ular bilen körüshelmeydighan boldi. Michüen türmisige yötkelgendin kéyin ularning hazirqi ehwalidin tamamen bixewer qalduq."

"Aqlighuchi adwokat bizge emdi yuqiri sotqa yene erz qilishning paydisi yoq. Uning üstige, kéler yili 2-ayda sot hökümi boyiche abduwelining qamalghinigha bir yérim yil toshidu. Shunga eng yaxshisi bu hökümge süküt qilinglar dégen idi. Shunga meyli abduweli bolsun yaki a'ilimizdikiler bolsun sot hökümige qarita yuqiri sotqa erz sunushtin waz kechtuq."

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet