ياپونىيە ئۇيغۇر جەمئىيىتىنىڭ بىلدۈرۈشىچە، ئۇيغۇر داۋاسىنىڭ ھارماس پىداكار ئەزاسى ياپونىيەلىك مۇسۇلمان ئايال مەرھۇمە سۈزۈكى ئاكىرا خانىم 6-ئاينىڭ 28-كۈنى مالايشىيانىڭ پايتەختى كۇئالالۇمپۇردىكى ئۆيىدە ۋاپات بولغان.
زىيارىتىمىزنى قوبۇل قىلغان مەرھۇمەنىڭ يولدىشى رۇدىي سۇۋاردى ئەپەندى، رەپىقىسىنىڭ ۋاپاتى ھەققىدە توختىلىپ مۇنداق دېدى:
-خانىمىم سۈزۈكى ئاكىرا كېچىدە ئۇخلاۋېتىپ، تۇيۇقسىز قىزىتمىسى ئۆرلەپ كېتىپ، ۋاپات بولدى. سۈزۈكى ئاكىرانىڭ ئۆلۈمى گۇمانلىق ۋە تۇيۇقسىز بولغانلىقى سەۋەبىدىن جەسىتى دوختۇرخانىدا تەكشۈرۈلۈپ، كېيىن بىزگە قايتۇرۇلۇپ بېرىلدى. ئەمما، رۇدىي سۇۋاردى ئەپەندىنىڭ بىزگە بىلدۈرۈشىچە، سۈزۈكى ئاكىرا خانىمنىڭ ئۆلۈم سەۋەبىنىڭ تەكشۈرۈش نەتىجىسى تا ھازىرغىچە ئائىلىسىگە ئاشكارىلانمىغان. مەرھۇمە سۈزۈكى ئاكىرا خانىمنىڭ جىنازا نامىزى ئىسلام دىنىنىڭ قائىدە-يوسۇنلىرى بويىچە كۇئالالۇمپۇردىكى مەسچىتتە ئوقۇلۇپ، مېيىتى شۇ يەردىكى مۇسۇلمانلار قەبرىستانلىقىغا دەپنە قىلىنغان.
سۈزۈكى ئاكىرا خانىم 1977-يىلى ياپونىيەدە تۇغۇلغان، ئالىي مەكتەپنى ياپونىيەدە تاماملىغان. كېيىن ئاۋسترالىيەدىكى تاسمانىيە ئۇنىۋېرسىتېتىدا ئوقۇپ كاندىدات دوكتور بولغان. ئۇ،ياپونىيە ئۇيغۇر جەمئىيىتىنىڭ پىداكار ئەزالىرىدىن بىرى بولۇپ، 2012-يىلى توكيودا ئېچىلغان دۇنيا ئۇيغۇر قۇرۇلتىيىنىڭ 4-نۆۋەتلىك قۇرۇلتىيىدا ياپون تىلىدىكى بارلىق ماتېرىياللارنى ئىنگلىز تىلىغا تەرجىمە قىلىش ۋە شۇنداقلا ياپون تىلىدا يازما ماتېرىياللارنى تەييارلاش خىزمىتىگە مەسئۇل بولغان. قۇرۇلتاي ئېچىلىشتىن باشلاپ تا ئاخىرىغىچە ھاردىم-تالدىم دېمەستىن كېچىنى كۈندۈزگە ئۇلاپ خالىسانە خىزمەت قىلغان.
سۈزۈكى ئاكىرا خانىم توكيودىكى خىتاي ئەلچىخانىسىنىڭ ئالدىدا ئۆتكۈزۈلگەن خىتايغا قارشى تۈرلۈك نامايىشلارغا كۆپ قېتىم ئاكتىپ ئىشتىراك قىلغان.
سۈزۈكى ئاكىرا خانىم 2004-يىلى مالايشىياغا ساياھەتكە بېرىپ، شۇ يەردە رۇدىي ئىسىملىك مالايشىيالىق بىر مۇسۇلمان يىگىت بىلەن تونۇشقان. 2011-يىلى 5-ئاينىڭ 4-كۈنى كۇئالالۇمپۇردا رۇدىي ئەپەندى بىلەن توي مۇراسىمى ئۆتكۈزگەن. توي كۈنى ئىسلام دىنىنى قوبۇل قىلىپ،ئىمان ئېيتقان.
سۈزۈكى ئاكىرا خانىم كۇئالالۇمپۇردىكى چاغلىرىدىمۇ شۇ يەردىكى ئىسلام ئۇنىۋېرسىتېتىدا ئىلىم-تەھسىل قىلىۋاتقان ئۇيغۇر ئوقۇغۇچىلارغا قولىدىن كېلىشىچە ياردەمدە بولغان. ئۇ،مالايشىيادىكى ئۇيغۇرلارغا ئائىت بەزى مەسىلىلەر ئۈستىدە دۇنيا ئۇيغۇر قۇرۇلتىيىنىڭ باش كاتىپى نۇرمۇھەممەت مۇسابايۇف بىلەن تور ئارقىلىق پىكىرلەشكەن.
زىيارىتىمىزنى قوبۇل قىلغان دۇنيا ئۇيغۇر قۇرۇلتىيىنىڭ باش كاتىپى نۇرمۇھەممەت مۇسابايوف بۇ ھەقتە توختىلىپ ئۆتتى.
مەرھۇمەنىڭ ۋاقىتسىز ۋاپاتى ياپونىيە ئۇيغۇر جەمئىيىتىدىكى ئۇنىڭ سەپداشلىرىنى، ياپونىيەدىكى ئۇيغۇر مەسىلىسىنى قوللىغۇچىلارنى قاتتىق قايغۇغا سالدى.
سۈزۈكى ئاكىرانىڭ ئىش-ئىزلىرى توغرىسىدا توختالغان دۇنيا ئۇيغۇر قۇرۇلتىيىنىڭ مۇئاۋىن رەئىسى ئىلھام مەخمۇت مەرھۇمەنىڭ ۋاپاتىغا ئۆزىنىڭ تولىمۇ قايغۇرغانلىقىنى بىلدۈرۈپ ئۆتتى.
ياپونىيەدىكى ئۇيغۇر داۋاسى ئۆزىنىڭ ھارماس پىداكار ئەزالىرىدىن بىرى بولغان سۈزۈكى ئاكىرا خانىمدىن مەڭگۈگە ئايرىلدى.
ئاۋاز ئۇلىنىشىدىن تەپسىلاتىنى ئاڭلاڭ.