Amérika Uyghur birleshmisi 5 - féwralni xatirilesh we xatirilitish oxshashla muhim

Xitay hakimiyitining 1990 - yillarning otturiliridin bashlap ghulja meshripini basturushqa bashlighanliqi, buning 1997 - yili 5 - féwral ghulja yashlirining namayishigha seweb bolghanliqi we netijide xitay hakimiyitining qanliq basturushi bilen xatimilen'genliki, Uyghur yéqinqi zaman tarixidiki untulmas zor bir weqe. 5 - Féwral ghulja weqesi Uyghurlarning hayati, küresh iradisi we chet'ellerdiki Uyghur dawasigha körsetken tesirlirining, ehmiyitining zor bolushi bilen dunyaning her qaysi jaylirida her yili oxshimighan shekillerde xatirilinip kelmekte.

Jümlidin amérika Uyghur birleshmisi we Uyghur insan heqliri programmisi - 5 féwral ghulja yashlirining tinch namayishini qanliq basturup insaniyetke qarshi jinayet sadir qilghan xitay hökümitini eyiblesh meqsitide, bügün xelq'aragha bayanat élan qildi. Biz, amérika Uyghur birleshmisining uyushturushi bilen - 5 féwral weqesining 18 yilliq xatirisige atap washin'gitonda ötküzülidighan pa'aliyetliri heqqide aldin melumat igiliduq.

Ziyaritimizni qobul qilghan amérika Uyghur birleshmisining re'isi alim séyitof ependi “Amérika Uyghur birleshmisi we xelq'ara Uyghur insan heqliri programmisi - 5 féwral ghulja weqesining 18 yilliqini xatirilesh yüzisidin - 3 féwral élan qilghan bayanat arqiliq, xitay hökümitining 1997 - yili - 5 féwralda tinch yolda namayish élip barghan Uyghur yashliri üstidin yürgüzgen qanliq qirghinchiliqining jawabkarliqini üstige élishini, we eyni chaghda namayishchilarni basturushqa qatnashqanlarning jinayi jawabkarliqini sürüshte qilishini küchlük telep qilish bilen birlikte, xitay hökümitini dawamliq türde Uyghurlar üstidin élip bériwatqan her qandaq basturushni toxtitishqa chaqirimiz” dédi.

Alim séyitof ependi, - 5 féwral ghulja weqesi we - 5iyul ürümchi weqesi oxshashla Uyghurlarning yéqinqi zamanda élip barghan ikki qétimliq tinchliq yolidiki heqliq namayishi, shundaqla xitay teripidin oxshashla rehimsiz halda basturulghan untulmas ikki chong weqe, bu weqelerni eslesh elwette muhim, emma bu weqelerni heqiqiti bilen ispatliq yazma xatirilep qaldurush, dunyagha anglitish we yash ewladlargha tonutush téximu muhim, shundaq qilghandila biz shu namayishlarda bedel töligen Uyghurlarning küresh we erkinlik rohigha izbasar bolalaymiz dep körsetti. Sözining axirida yene muhajirettiki Uyghurlarni bolupmu yashlarni - 5 féwral rohini dawam etküzüshke, dunyaning her qaysi jaylirida élip bérilidighan xatirilesh, namayish pa'aliyetlirige aktip qatnishishqa chaqiriq qildi.

Amérika Uyghur birleshmisi Uyghur insan heqliri programmisi mes'uli zubeyre shemsidin xanim ziyaritimizni qobul qilip,özi üchün élip éytqanda, féwral éyi kirishi bilen eng aldi bilenla - 5 féwralni esleydighanliqini, bu kün xitayning Uyghurlargha dölet derijilik qanliq basturush élip barghan, Uyghurlar tarixidiki untulmas qabahetlik bir kün dep qaraydighanliqini, shundaq bolghanliqi üchün bu qanliq künni xatirilesh we xitaygha Uyghurlarning bu künni hergizmu untup qalmaydighanliqini, basturush bilen Uyghurlarni erkinlik iradisidin yanduralmaydighanliqini xatirilitish we Uyghurlargha qarita qirghinchiliqni toxtitishqa agahlandurush nahayiti zor ehmiyetke ige dep qaraydighanliqini bildürdi.

Zübeyre xanim yene “Biz Uyghur teshkilatliri, Uyghur pa'aliyetchiliri shundaqla her bir Uyghur, xitayning - 5 féwraldiki qanliq jinayiti dunya aldida sürüshtürülmey turup, naraziliqimiz ni hergizmu toxtatmaymiz” dep tekitlidi.